МахIаммад – Ккуллал шяраватуссар, увссар 1991 шинал, ванан дур цIана 31 шин. Гьашину майрай Аьрасатнал ФСИН-далул системалий зузиминнал дянив Москавлив хьусса Дандибуккавурттал чемпионатрай ххув хьунни Ккуллал шяраватусса МахIаммад Билалов.
Му турнирданий гьуртту хьуссар билаятрал циняв регионнал спортсментал. Жула ватанлувнал кIушиврий (85 кило) бяст-ччаллавух гьуртту хъанай ивкIун ур 25 инсан. МахIаммад ивну ур 5 муттаэнащал. ДачIифиналданий ва ххув хьуну ур Хакасиянал ию Константин Торшиннуяр, финалданий тIурча, МахIаммадлул муттаэну ивкIссар Чачаннавасса Мурат Терххуев.
ЦIубутIуй МахIаммад машхул хъанай ивкIун ур лачIун уккаврихун, таний буттал шяраву лачIунбуккултрал секция бивкIун бур. Гьуртту шайсса ивкIун ур районнал даражалийсса бяст-ччаллавух, диркIун дур та чIумалгу хьхьичIуннайшивуртту: бугьайсса бивкIун бур цалчинми кIанттурду.
2009 шинал МахIаммад дуклан увххун ур ДГТУ-лувун. Мура чIумал машхул хъанан ивкIун ур хIала-ккаласса дандибуккавурттахун (смешанные единоборства). Шикку ванал тренерну хьуну ур чIявусса хьхьичIун ливчусса спортсментал хIадур бувсса инсан, лаккучу Бадави ХIасанов. ВаначIа лахьлай ивкIун ур самболий ва панкратиондалий уклан. Гьуртту шайсса ивкIун ур вузирдал дянивсса бяст-ччаллавух, миккугу цалчинми кIанттурду бугьайсса бивкIун бур.
2014 шинал Москавлив хьусса Аьрасатнал хIала-ккаласса дандибуккавурттал чемпионатрай бувгьуну бур 1-мур кIану. Тара шинал дунияллул халкьуннал дянивсса дандибуккавурттал турнирданий бувгьуну бур 2-мур кIану. 2019 шинал Аьрасатнал чемпионатрай бувгьуну бур 2-мур кIану. Ххув хьуну ур профессионалтурал дянив ACB-лул лигалул чемпионатрайгу.
2019 шинал МахIаммад Билалов зун ивкIун ур ФСИН-далул идаралий. Гара шинал хьуну дур KFL-лул лигалул чемпион.
Ва каялувшиву дуллай ур «Арт Патриоты» тIисса жяматийсса сакиншиндарай. Идара зий бур жагьилтурал политикалуха, дайсса дур спортрал турнирду ва цаймигу давуртту.
«Илчилул» редакциялул чулухагу барча тIий вихь, МахIаммад, ххувшаву, чIа тIий буру ялунмайгу тIайлабацIуртту, хьхьичIуннайшивуртту!
