[dropcap]М[/dropcap]ахIачкъала шагьрулул Депутатътурал мажлисрал 32-мур сессиялий МахIачкъала шагьрулул бакIчину увчIунни 61 шинавусса Умавов Юсуп Джанбеклул арс. Ваниннин ва ДР-лул Халкьуннал Мажлисрал Промышленностьрал, ЖКХ-лул, транспортрал ва ххуллул хозяйстволул комитетрал каялувчину ивкIссар.
Увну ур Юсуп Буйнакскаллал райондалийсса Къадардал шяраву. Ва ур экономикалул элмурдал кандидат. Кьурахъул шиннардил мутталий зий ивкIун ур паччахIлугърал личIи-личIисса къуллугъирттай. 2008-2013-ку шиннардий ва ивкIссар ДР-лул Строительствалул ва ЖКХ-лул министерстволул ВацIлул хозяйствалул агентствалул каялувчину. Юсуп Умавов ивкIссар Республикалул президентнал маслихIатчинугу, Республикалул строительстволул ва ЖКХ-лул министрнугу, мукуна ДР-лул машлул ва кьатIаллищалсса экономикалул дахIавурттал министрнал буржру биттур буллалиману, машлул ва инвестициярттал министрну. УвчIуну ивкIссар ДР-лул Халкьуннал Мажлисрал депутатнугу.
Вай бувчIавурттай шагьрулул 41 депутатнава 38-ннал чIурду буллунни Юсуп Умавовлухлу. Ваниннин ванащал финалданийн мукунма бувкссия Арсен МахIаммадов ва Имам Рамазанов.
Вай бувчIавуртту цукун ларгссарив бувсунни МахIачкъала шагьрулул Депутатътурал мажлисрал председатель Марис Илиясовлул:
– ХIакьину щаллу хьуссар шагьрулул бакIчи увчIлачIисса конкурсрал 3-мур этап. Шагьрулул Депутатътурал мажлисрал сессиялий бувсса хIукмулийн бувну, шагьрулул бакIчину хIакьинуния тийнай хъанахъиссар Умавов Юсуп Джанбекович. Ва иширащал МахIачкъала шагьрулул цинявппагу инсантал барча буллай ура. Хъуннасса агьамшиву дуссар цала кIанай, «и.о» акъача, шагьрулул 5 шинал манзилданийсса бакIчи ушиврул, най унува цалла дуллан нанисса даврил стратегиялул плангу сакин дурну, гьарца давринсса чIунгу хIисав дурну зий айишин бюхълахъисса. Умуд бур, уттинин кунма, ттиния тийнмайгу МахIачкъалаллал шагьрулул Депутатътурал мажлис шагьрулул администрациялуцIун уртакьну зунссар тIисса. Мукунма умуд бур цIусса каялувчинащал цIушиннарду, хъин чулиннайсса дахханашивуртту хьунссар тIисса.
ЦIусса каялувчи – му мудангу цIусса ургавур, цIусса пикрирдур. Юсуп Джанбекович цувагу хъунмасса опыт бусса, уттинингу личIи-личIисса структурардай каялувшиву дуллай ивкIсса инсан ур, мунияту дакI дарцIуну буру хьхьичIунмай нанаврил цIусса этап шагьрулул мажлисрайгу, шагьрулул администрациялийгу дайдишинтIишиврий, жувагу ва шагьрулий цимирагу шинай салкьи хъанай диркIсса захIматшивурттавату чан-чанну тIий буклай байбишинтIишиврий. Жунма цинявннанмагу кIулну бия щаллу буван аьркинсса, чулу хьусса вай циняв масъаларттая, вайннуя цимилгу ва цикссагу ихтилатругу шайва. Умуд бур, цинявнналагу кумаграйну – Республикалул БакIчиналгу, ХIукуматралгу, Халкьуннал Мажлисралгу хIала буххаврийну, вай цимурца щаллу хъананссар тIисса, – тIий ур Марис Илиясов.