Щалагу дунияллий кIицI лагайсса ОьрчIру буруччаврил кьинилун хас дурсса «Играй, гармонь любимая!» тIисса мероприятие хьунни ЧIяйннал шяраваллил культуралул къатлуву. Ванил сиптачину хьунни ЧIяйннал шяраваллил культуралул къатлул хъунмур СалихIат Алхасова.
Гьарица шинах оьрчIал байран лавайсса даражалий тIайла дуккан хъунмасса захIмат бишай СалихIат Алхасовал. Ва ххуллухьсса байрандалул мажлис тIитIлай, оьрчIру барча буллалисса ихтилатгу бунни ванил цилва. КIицI лавгунни жува цинявппагу оьрчIахлу хъуннасса жаваблувшиву дуруччин буржлувну бушиву. Гьарицагу оьрчI ниттил ва буттал дянив хъуна хьун аьркиншиву, оьрчIан гьарицагу лахIзалий нитти-буттал ччаву асар хъанай дикIан аьркиншиву. ЧIа увкунни оьрчIан тяхъасса оьрчIшиву, талихI-тирхханнарайсса оьрму, цIуллушиву.
Хъирив ЧIяйннал школалул дуклаки оьрчIал увкунни балайрду, бувккунни шеърирду, ккаккан дунни къавтIавуртту.
Дунни оьрчIру таза буккансса конкурсру ва тIуркIурду.