Дагъусттаннал паччахIлугърал технический университетраву жагьилтурал элмийсса давурттал конкурсру даву аьдатравун дагьну дур. Конкурсрай гьуртту шайсса бур студентътал, аспирантътал ва Дагъусттаннал цаймигу вузирдаву дуклакисса техникалул, социал-экономикалул ва гуманитар элмурдахун машхул хьуми. Гьашину конкурсрайн 40 заявка дуркIун дур, миннуватугу 27 кьамул дурну дур. Вай цинявннуву личIи дурну дур элмулун ва оьрмулун агьамшиву дусса, элмулул цIушиннарду аьч дуллалисса давуртту. ХьхьичIунсса аьлимтуравух бур лакгу – Цалчинмур ЦIувкIратусса Рамазан Къалмаев ва Анжела Кьурбанаьлиева.
Рамазаннул проектран лахъсса кьимат бивщуну бур социал-экономикалул ва гуманитар элмулул давурттаву. Ва лайкь хьуну ур кIилчинмур даражалул дипломран. Ванал каялувчину бур доцент Земфира Раджабова.
Кьурбанаьлиева Анжелалмур проект техникалуцIун, аьщуйн щуну учиннив, дуки-хIачIия ранг дуваврил технологиялуцIун дархIусса дур, ванилмур даврил каялувчи бур доцент Давудова Татьяна.
ХьхьичIун ливчуминнан дипломру буллунни ДГТУ-лул ректорнал къуллугъ чIумуйну бартбигьлагьисса Назим Баламирзаевлул. КIицI лаган аьркинни ва вузраву гьар шинах «Элмулул нюжмар» хIисаврайсса мероприятие дикIайшиву, жагьилсса аьлимтураща цала бюхъу-гьунарду ккаккан буван хьуншиврул. «Элмулул нюжмар — 2023» апрель зурул ахирданий хьуну дур. Ва мероприятиялул лагрулий дурну дур конкурсрал хIасиллугу. ДакIнийхтуну барча буллай жулва жагьилсса аьлимтал, чIа тIий буру цIу-цIусса ххувшавуртту ва хьхьичIуннайшивуртту.
