ЦIумадиял райондалийсса Агъвали шяраву лахъа-хъунсса даражалий хьунни Дагъусттаннал лайкь хьусса учитель Айгунов МахIаммад Ризауттиннул арснал аьпалун хас дурсса Спортрал фестиваль.

[dropcap]Ч[/dropcap]чясса оьрмулий дунияллия лавгсса буттал аьпа абад баву мурадрай, ванал арснал, Дагъусттаннал панкратиондалул цачIун дур командалул хъунама тренер, МахIачкъала шагьрулул 49-мур школалул директор Аьвдулкарин Айгуновлул гьарица шинал, лавай­сса даражалий сакингу дурну, цIанихсса вакилталгу бавтIун, дувай Спортрал фестиваль.
Аьвдулкариннул ва ххуллухьгу сакин дунни ххаллилсса фестиваль.

Спортрал бяст-ччаллай гьур­тту хьунни МахIачкъала шагь­рулиясса, Лакрал, Ахъушиял, Хасавюртуллал, ЦIунтIиял ва ЦIумадиял районнаясса жагьилтал.
Фестивальданул бусравсса хъамаллуравух бия ушу-саньдалул Аьрасатнал ряххийла чемпион Мурад Ахадов, ЦIумадиял райондалул бакIчи Шамил Оьмаров, Силди шяраваллил бакIчи МахIаммад НурмахIаммадов, хIала-ккаласса данди буккавурттал дунияллул кIийла чемпион МухIаммад Жабраилов, «Россети Северный Кавказ» — «Дагэнерго» ПАО-лул Аппаратрал каялувчи Арсен ХIажиев, МахIачкъала шагьрулул Кировский райондалул мировой судья Камил Мащилиев.

«Ттул ппу, Ризауттиннул арс МахIаммад, бусса оьрмулий директорну зий уссия Бабаюртуллал райондалийсса Сангардал дянивмур даражалул школалий. Гьашину ванал аьпалун хас дурсса спортрал турнир на мяйлчинна дуллалисса. Ларгсса шиналсса фестиваль хьуссия Дарбант шагьрулий Нарын-къалалучIа, мунияр хьхьичI дурссия МахIачкъалалив, буттал шяраву Карашав. Ххувшаврил 78 шин шаврин хасну, гьашинумур фестиваль дан пикри хьунни ЦIумадиял райондалий­сса Агъвали шяраву.

Турнирду даврил агьаммур мурадгу хъанахъиссар жагьилтал спортрахун бичаву ва ми тIайлану тарбия баву. Рязину ура фестивальданий гьуртту хьун ччисса жагьилтал ялу-ялун гьарза хъанай бушиврий. Хъунмасса барчаллагьрай ура, спортраву, давриву, оьрмулуву бикIу, дуллалисса давурттал чIарав бацIайсса ттула дустурайн», – тIий ур Аьвдулкарин.

Спортрал фестивальданул программалуву бия гирарду ва чартту гьаз баврил, пут личаврил, архъан кIункIу даврил, 100 ва 800 метралийх лечаврил, ка дишаврил, тIанкI учаврил, чIатIаракI ритаврил ва цаймигу бяст-ччаллу.

Спортрал бяст-ччаллаву хьхьичIунсса хIасиллу дунни МахIачкъалалиясса Александр Дормидонтовлул ва Дмитрий Александровлул, ЦIумадиял райо­ндалиясса МахIаммад Хас­булаевлул, Ахъушиял рай­он­далиясса МахIаммад Ма­хIаммадсалихIовлул ва МахIам­мад Сааьдуллаевлул.

Жагьилтуравун яла гьавас бутлатимур бяст-ччалну бия архъан кIункIу даврилмур. Ши­кку цалчинмур кIану бувгьунни ЦIумадиял РОВД-лул командалул, кIилчинмур кIану – Тинди шяраваллил командалул ва шамилчинмур – Агъвали шяраваллил гимназиялул.

Ахирданий, аьдатравун багьсса куццуй, хьхьичIунсса кIанттурду бувгьуминнан дуллунни хIурматрал грамотартту, медальлу, кубокру ва арцуйну­сса бахшишру.