«ЧIуннихха буниялану шяравалу цIу лаган дувавриха зун!» – вана укунсса лозунг дур июньдалул 2-нний ва 3-нний хьунтIисса «Цовкра-1. Перезагрузка» тIисса проектрал стратегиялул сессиялул гьанумур темалул. ХьхьичIмур кьини сессия хьунтIиссар МахIачкъалалив, хъирив кьини — ЦIувкIрав.

[dropcap]М[/dropcap]ероприятиялул лагрулий ккаккан дувантIиссар цIанихсса урбанистътурал, историктурал ва туризмалуха зузиминнал, экспертътурал шяравунсса экспедициялул хIасиллу дуллалисса документал журалул киносуратгу. 2017 шинал хьуссия «Лакия. В поисках айдентики» тIисса экспедиция ва 2022 шиналгу «Цовкра-1. Перезагрузка». Ва даврил сиптачи МухIаммад Юнусовлул бувсунни сессиялий гьарза-гьартану ххал дигьинтIишиву шяравалу цIу дуккан дуваву мурадрайсса проектру. «Шяравалу цIу дуккан дуваншиврул чара бакъа шяравун бизан аьркинссар шагьрурдай яхъанахъисса жагьилсса кулпатру. Къатри дуваврия, зунсса кIантту дузал буваврия, экономикалия, маэшат гьаз буваврия, гьармуния бикIантIиссар аьщуйн щусса, маслихIатрайсса ихтилатру.

[dropcap]Ш[/dropcap]яравуми шяраву, шагьрурдайми цаласса буллай пайда бакъассар, ппухълуннал мина цинявннан аьмссар, дакI цIуцIавугу, чIарав бацIавугу аьмсса, гьурттусса дикIан аьркинссар. Сакиншиннарал комитетрал цума цукунсса кумаг буван хIадурну уссарив ххал буллалисса опрос дуварду, иширайну, мукъуйну чIарав бацIан ччисса, тийнмайну къабавцIуну проект агьамсса даврин ккалли дурну хIала бухлахисса бур, бурганну», – увкунни ванал. Ва мероприятиялул хасъсса эксперт ур Калининград шагьрулиясса Святослав Мурунов, урбанист, шагьрурду хьхьичIунмай баврил эксперт, социал проектированиялул моделлал автор.

Вагу ив­ссар, экспедициялул член хIисаврай, ЦIувкIрав. Шяравун бучIан къавхьуминнаща, кьатIаллил билаятирттай яхъанахъиминнаща мероприятие ххал дуван хьунтIиссар онлайн трансляциялул кьяйдалий. Ва даврил агьамми партнертал бур Дагъусттаннал БакIчинал ва ХIукуматрал Администрация, Дагъусттаннал экономикалул министерство, Дагъусттаннал Туризмалул министерство, Информациялул ва печатьрал агентство, Дагнаследие РД, АПИ РД, ЦIувкIуллал шяраваллил администрация, Лакрал идарарттал ассоциация, «Друзья милосердия» тIисса ихIсандалул ассоциация, Прикладная урбанистикалул институт (Калининград).

[dropcap]И[/dropcap]нформациялул партнертал: ГТРК «Дагестан», РГВК «Дагестан», «Народы Дагестана» журнал ва «Илчи» кказит. Уттигу ва мероприятиялул партнер хьун ччисса ухьурча, оьвкуну, баян бувара ва номерданийн: 8-960-409-36-06. Шяравумур сессиялий, экскурсия бувну, хъамаллуран ккаккан дувантIиссар тIабиаьтрал хIикматру ва архитектуралул кьиматрайсса гьайкаллу. Гьарза-гьартану ва даврия бусан ЦIувкIрав наниссар «Илчилул» корреспондентгу, хъирив бацIияра, хъиндайдихьу хьуннав тIий, дуаь дувара. Цимил учирчагу, жунма цинявннан бувчIлайгу, чIалайгу бур, агар хIакьину жущава буттал кIану буруччин, ябан къахьурча, мяйжаннугу чIал хьуну лякъин бюхъайшиву. ЦIувкIуллал жагьилтурал хIарачатгу, хъит учавугу чантI учаврил ва ядуван шаймур ядаврил ххуллийсса дур.