Жу ттинингу тамансса бусарду Украиннал аьрщарай нанисса хасъсса аьралий операциялий жанну дуллуминнал ниттихъул, щахъами, ссурвал цачIун хьусса жяматийсса ккурандалия ва му ккурандалул биялалий дуллалисса давурттая. Буйнакскаллал райондалул Лувмур Къазанище шяраватусса Сайкумовхъал цала арснал МахIачлул аьпалун цIа куну бувгьусса багърая, Мисай ХIусмановал цила арснан Ссунгъурдун цIа куну буллай байбивхьусса мизитрая, ПатIимат Пайзуллаевал цачIун буллалисса аьпалул луттирая ва цаймигу давурттая.

Ххувшаврил байрандалул хьунингу ва ккурандалул биялалий дурунни тамансса давуртту.
Хьуссар Лувмур Къазанище шяраву «МахIачлул багъраву» ахъулссаннул мурхьру бугьаврил ххуллийсса акция. ДакIнийн бутанну, ва багъ бувгьуссар ларгсса шинал интту Ххадижат ва Расул Сайкумовхъал, цала арснал аьпалун багъ бугьан дуллусса 90 гектар аьрщарай. Ва багъраву ххярхсса ахъулссагу пикрилий бур ахIвал кIюласса кулпатирттайх, мушакъатсса оьрчIансса центрдайх дачIлан.

Багъравун бухлахисса кIанттай бацIан бувну бур МахIачлун хас бувсса аьпалул чару. Шиккува бувну бур увкIма ликкаван­сса къаттагу.
– Ва къатта ужагъну хьун аьркинссар хасъсса аьралий операциялий чувшиврий жан дуллусса цума-цагу аьрасатлувнал кулпатран. Жу шиккун батIавантIиссару ччя-ччяни, жула оьрчIру дакIнийн бичаваншиврул, – тIий бур Ххадижат.
Республикалул БакIчи Сергей Меликовлул амрулийн бувну, хасъсса аьралий операциялий жанну дуллуминнал гъан-маччаминнал чIарав ацIан, акциялий гьурттушинна дан увкIун ия ДР-лул ХIукуматрал жяматийсса проектирдал отделданул хъунаманал хъиривчу Рамазан Рамазанов. «Даг­лесхозрал» буллуну бия багъраву бугьансса личIи-личIисса гьаннарал мурхьру.
Акциялий гьуртту хьусса Буйнакскаллал райондалул бакIчи Аьбидин Карчигаевлул кIицI лавгунни райондалул администрациялул каширдацIух «МахIачлул багърал» лагма-ялттусса кIанттурду ххуй-хъин бан дакIний бушиву.

Акциялий гьуртту хьунни Ххадижат Сайкумовал классраву дуклакисса Лувмур Къазанище шяраваллил школалул дуклаки оьрчIругу.
Ккурандалул сипталийну май зурул 7-нний МахIачкъалалив хьунни, Ххувшаврил байрандалун хас дурсса, хасъсса аьралий операциялий чувшиврий жанну дуллуминнан ва хIакьину тикку гьур­тту хъана­хъиминнан цIа кусса автопробег «ZаМир Zа Победу». Ва акция тIайла ду­ккан кабакьу бунни МахIачкъала шагьрулул Ленинский райондалул депутатътурал, Жагьилтурал министерствалул ва «Дракон» паркрал администрациялул.

«Дракон» паркрава бувккун, Буттал КIанттул цIанийсса Хъунмасса дяъвилул гьурттучитурал ва хасъсса аьралий операциялий ливтIуминнал суратирттащал­сса машинартту бувкIуна Ленинский комсомолданул паркрачIан. Шикку акция къуртал хьуна муний гьуртту хъа­хъиминнал абадсса цIарачIа, Ниттин ва талаталан хас дурсса гьайкалдануцI тIутIив дишаврийну.
Май зурул 9-нний, Ххувшаврил байрандалул кьини, «Муслимат» ккурандалий хьунни хасъсса аьралий операциялий жанну дуллуминнал рухIирдаяту зикри бихьлахьисса мероприятие.
ХIакьинунин ниттихъал ккурандалуща датIин бювхъусса сияхIравусса 250 виричунал гьарцаннал цIагу дурккуну, суратругу хьхьичI дирхьуну, «Муслимат» ккурандалул вакилтурал бивхьунни зик­ри, дурккунни дуаьртту.

КIицI банну, хIакьину «Сила матерей» ккурандалувун бухлай бур 250-ннийн бив­сса хъами. Вай кувннал чIарав кув бацIлай бур личIи-личIисса тагьардаву, архIал ляхълай бур ватандалул ххуллий чувшиврий жанну дуллусса язиминнал аьпа абад бан­сса чаранну. Вайннул гьарцаннал бур цава-ца хиял – хIакьину Украиннал аьрщарай нанисса хасъсса аьралий операция Аьра­сатнал аьралий гужирдал ххувшаврийну къурталгу хьуну, тикку талатисса жула арсру сагъ-саламатну цала кулпатирттал ялун зана бикIаннав тIисса. Мунил цIаний бацIаву дакъа лабизлай бур Аллагьнайн.