Апрель зурул 27-нний ЦIуминалийсса ЦIуссалакрал райондалий Чапаево шяраваллил 2-мур школалий тIиртIунни «Движение первых» тIисса Аьрасатнал оьрчIал ва жагьилтурал суккушиндарал отделение.
ДакIнийн бутанну, «Движение первых» тIисса Аьрасатнал жагьилтурал ва оьрчIал суккушинна сакин дуршиву Аьрасатнал Президентнал 2020 шинал бувсса хIукмулийн бувну. ХIакьинусса кьини ва суккушиндаравун бухлай бур 400-нийн бивсса дуккаврил идарартту. Жагьилтурансса суккушинна хIасул даврил агьаммур мурад бур оьрчIру патриот зумуну тарбия баву ва ми бялахъансса шартIру дузал даву.
Чапаевкаллал 2-мур школалий «Движение первых» тIисса дуклаки оьрчIал суккушиндарал отделение тIитIинсса сиптачиталну бувккунни ва школалий жяматийсса идарарттащалсса даву дачин дурсса Загьидат Рамазанова ва школалул завуч.
Мероприятие дайдирхьуна, Аьрасатнал Федерациялул ва Дагъусттаннал ттугъругу гьаз бувну, дуклаки оьрчIал Аьрасатнал ва Дагъусттаннал гимнру учаврийну.
Школалийн бувкIсса бусравсса хъамаллуравух бия Чапаевкаллал шяраваллил бакIчи Марис МахIаммадов, ванал хъиривчу Нураттин Исмяилов, ветеран-педагог, «Росдетцентр» ФГБУ-лул хьхьичIунсса эксперт Жамилат Мусиева, дуклаки оьрчIал нину-ппу ва цаймигу.
ОьрчIру барча буллалисса ва патриот зумунусса насихIатру буллалисса ихтилатру бунни Жамилат Мусиевал, Марис МахIаммадовлул.
Мероприятиялул лагрулий учительтурал хIадур дурну дия оьрчIал творчествалул давуртту. Школалул коллективрал ккаккан дунни къавтIавуртту, гимнастикалувусса гьунарду.
Ахирданий гьурттучитурал хъазамирттай лавчIуна георгиевская лентарду.
