Лакрал райондалий аьдатравун дагьну дур гьарца шинал инттухуннай «Единая Россия» партиялул вакилтурал ва чул бувгьуминнал субботникру даву. Гьашину субботникру дия апрель зурул махъра-махъсса нюжмардул лахъишиврий ва 1-мур Майрал кьини, Интнил ва ЗахIматрал байрандалул кьини.

Партиялул чул бувгьуминнал ва райондалул идарарттал зузалтрал гьурттушиндарайну субботникру дунни Гъумук ва гьарца шяраву. ЧчюрклицIа марцI бунни идарарттал лагма-ялттусса кIантту, паркру, ххуллурдал зума-къирагъру, бувгьунни мурхьру.

Му бакъассагу, Ххувшаврил байрандалул хьунин партиялул чул бувгьуминнал, райондалул ва шяраваллал администрациярттал зузалтрал цин лархьхьусса тагьарданийн дурцунни Буттал кIанттул цIанийсса Хъун дяъвилия зана къавхьуминнансса гьайкаллу ва миннул лагма-ялттусса кIанттурду.
– Субботникрай гьуртту шаву – хъинсса аьдатри, агьали тIабиаьтраха, жува зий-заназисса кIанттурдаха аякьа дуллали баврил ххуллийсса, – увкунни Лакрал райондалул бакIчи, «Единая Россия» партиялул кIанттул отделениялул секретарь Юсуп МахIаммадовлул.