Апрель зурул 8-нний Ростов-на-Дону шагьрулий хьунни Дунияллул халкьуннал дянивсса мяйлчинмур музыкалул фестиваль «ПРИЗНАНИЕ». Фестиваль хас дурну дур дунияллийх машгьурсса композитортурал юбилейрал датардан. Цил агьаммур мурадну хъанай бур ттизаманнул жяматрал рувхIанийшиву цIу дуккан даву, буттал кIанттул магьирлугъ хьхьичIуннай даву.
Гьашинусса конкурс хас дурну дия Сергей Васильевич Рахманинов дунияллийн увккун 150 шин бартлагаврин.
Ва фестивальданий «Академический вокал» номинациялул лауреат хьуну бур жула лакку душ, Г. ХIасановлул цIанийсса МахIачкъалаллал музыкалул училищалул 3-мур курсрал студентка Аьбдуллаева Лайла ХIажимурадлул душ. Ванин балай учаврил усттаршиву лахьхьин дуллай бур вокалданул магьирлугърал отделениялул хъунмур Эльвира Маммадаева, фестивальданийнгу ванил бур хIадур бувну. Вагу бур лакку душ.
Фестивальданул жюрилул хъунмур С.В. Рахманиновлул цIанийсса Ростовуллал паччахIлугърал консерваториялул «Вокальное искусство» кафедралул хъунмур, профессор Татьяна Шорлуяннул лавайсса кьиматрай кIицI лавгун бур Лайлагу, ванил преподавательгу.
Лайла Аьбдуллаевал нину-ппу бур Кьукниятусса, бувну бур МахIачкъалалив.
Лайлал ниттил ниттин Нинан хIисав хьухьунссия ванил чIу ягу балай учаврил гьунар, ваних вичIидишин бансса мурадрай ххюра шинавусса душ кагу дургьуну бувцун бувкIун бур Мурад Къажлаевлул цIанийсса гьунар бусса оьрчIансса школалийн. ЧIивитIу найбуна кьамул бувну бур школалийн. Гикку дуклакиссаксса хIаллай чIявуссалийла лавгун бур Валерий Гергиевлул каялувшиндаралусса Аьрасатнал оьрчIал цачIун дур хорданущал гастроллай.
Мурад Къажлаевлул цIанийсса гьунар бусса оьрчIансса школалул ансамбльданущал гьуртту хьуну бур Сочилив кIинтнил Олимпий тIуркIурду лакьлакьисса шадлугърай, Санкт-Петербурграй Мариинский театрдануву, Кремлилуву, Къиримнаву, Ялталив.
ХьхьичIунсса ккаккиярттащал музыкалул школагу къуртал бувну, дуклан бувххун бур Г. ХIасановлул цIанийсса МахIачкъалаллал музыкалул училищалийн. АрхIалва Лайла зий бур Дагъусттаннал Опералул ва балетрал театрдануву хорданул артистну.
Творчествалул инсантуращал ихтилат буллалийни, цалчинма цалчин жува цIуххару, гьунар щия бивссарив, му, хъунмурчIин, ирсирай бияйсса бухьувкун.
– Балай жул кулпатраву щилчIав къаучай. Амудадал хIарачат бувну бия ттул дадавунгу, ниттирссивунгу музыкалухсса ччаву рутан, пианиногума лавсун бия. Махъ га пианиногу ттун пишкаш бувну, ганил на музыкалул школалийн биян бувнав.
Хъунмур ниттирссил къуртал бувну бия Музыкалул школа, Нину тIурча цаппара шиннардий занайгу бивкIун, спортралмур секциялийн лавгун бия. Яла тIурча, щала ингилис мазрахун машхул хьуну бия. Дарс дихьлай буссия институтраву, цIана зий бур репетиторну.
ЧIивиний на хъунмур чIун ттаттащал ва амудадащал гьан дайссияв. Ттул ттатта Тимур Хавчаев, цува физик-математик ивкIхьурчагу, ия хIакьсса меломан, ххирая классикалул музыка. Нагу ганащал вичIидирхьуну бикIайссияв.
– Утти ттатта ухьунссар вил яла дакI тIайлама вичIидихьу?
– Ди, мяйжаннугу. Ттаттагу, амудадагу ххарину бур на классикалул балайлухун багьаврия, на язи бувгьусса ххуллия.
– Ми ххари буллансса тIайлабацIуртту чан къабаннав вил оьрмулуву, Лайла!
