Жамал Юсупов (ГьунчIукьатIрал школа), Автондил Хизиев (Хъурхърал школа), Назира Кичаева (Щардал школа),
Зураб Чавтараев ва Рабият Шахшаева (Гъумучиял школа).
«Движение первых» тIисса Щалагу Аьрасатнал жяматрал ва паччахIлугърал оьрчIал ва жагьилтурал ккурандалул оьрчIру ватан ххирану тарбия баврил ххуллий дуллалисса мероприятиярттал лагрулий апрель зурул 12-нний, Космонавтикалул кьини, Гъумук хьунни «Мы – граждане России!» тIисса акция. Цувгу хас дурну дия оьрмулул 14 шин бартларгсса аьрасатлувтуран паспортру булаврин.
Мероприятие хьунни шадлугърал лагрулий райондалул магьирлугърал къатлуву, Совет Союзрал Виричу, летчик-космонавт Муса Маннаровлун хас дурсса выставка тIиртIусса залдануву. Паспортру акциялул лагрулий буллан ккаккан бувну бур оьрчIан ва цала оьрмулуву агьамсса лахIза дакIний личIансса, цува Аьрасатнал инсан ушиврия пахру багьансса мурадрай.
Акция сакин дурну дур райондалул администрациялул Жагьилтурал политикалул, спортрал ва туризмалул отделданул.
Шикку гьуртту хьунни райондалул каялувчитал, администрациялул ва магьирлугърал идаралул зузалт, паспортру ласласисса оьрчIал нину-ппу.
Акция дайдирхьуна Аьрасатнал ттугъ лавсун бучIаврийну.
Райондалул бакIчи Юсуп МахIаммадовлул увкунни:
– Жунма хьуссар авадансса тарих ва надирсса ирс бусса, чIявусса миллатру ва культурарду цачIун хьусса билаятрай ялапар хъанансса бахтти. ХIакьину паспортру ласлай, зу хъанахъиссару бюхттулсса билаятрал инсантал. Ххирасса оьрчIрув! Зул хьхьичI буссар лахъисса оьрмулул ххуллу. Умуд бур жу зухьва дакIнийхтуну тIутIисса ххуллухъиндарал мукъурттилгу асар биян банссар т1исса зу тIайласса ххуллийн буккан. Зува чув бухьурчагу, кьадарданул чунмай бичирчагу, лайкьну дуруччара аьрасатлувнал цIа. Буруччияра зула бакIрал чагъар! Букканнав зуя жула билаятралгу, райондалулгу лайкьсса инсантал!
Хъинсса аьдатну хьуну дур паспорт ласласийни хъа бувайсса. Цинявппагу паспорт ласласиминнал цIанияту мукунсса хъа бувунни Гъумучиял школалул дуклаки душ Рабият Шахшаевал, Муния махъ райондалул бакIчинал кIунттища цала яла агьаммур документ лавсунни дуккавриву ва спортраву хьхьичIунсса ххюя дуклаки оьрчIал.
Акция къуртал хьунни райондалул магьирлугърал къатлул зузалтрал концерт ккаккан даврийну.
