ТтурчIиял жяматраву махъ нанисса, хIурматрайсса инсантурая сакин дурну дур «ТтурчIидагъ» тIисса жяматрал масъалартту щаллу бавриха зузисса ккуран. Ва ккурандалул бакIчинугу увчIуну ур чулийн увксса полковник Растиван Беков. Ва чIярусса шиннардий зий ивкIссар КГБ-лул органнаву ва цаймигу жаваблувсса давурттай. Цаявагу, ккурандалиягу цIухху-бусу баву мурадрай, жу хьунабавкьуру ванащал.

– Растиван, байбихьулий виятува, вила тухумрая бувсун ччива.
– На увну ура 1955 шинал ЦIуссалакрал шяраву, чIявусса оьрчIру бусса кулпатраву – ххюва душ ва шама арс. Ттул ппу Беков Хизри ТтурчIиял шяраву (бизан баннин) цал советрал председательну, яла колхозрай зий ивкIун ур. Яла Хасаврайн ивзун, хъунмасса хIаллай ги­кку заготовительну зий ивкIссар. Ттул шанма ссу элмурдал кандидатътал хьуну бур, уссу Рустам биологиялул элмурдал докторди, зий ур Москавлив. Вьетнамнаву ва Италиянавугу зий ивкIссар мадарасса хIаллай. Хъунмур ссу Сиясат Дагъусттаннай цалчинмур хъамитайпар физика-математикалул элмурдал кандидатнал цIа ларсъсса.
На, Дагъусттаннал университетрал биологиялул факультетгу къуртал бувну, Хасавюртуллал шагьрулул комсомол давурттай зий уссияв – цал шамилчинма, яла к1илчинма секретарьну. Махъ тIайла увккунав КГБ-лул органнавун. Микку отделданул хъунаманал къуллугърайн ияннин, полковникнал чин ласуннин зий уссияв. Махъсса ппурттуву зий ивкIра Да­гъусттаннал Террорданийн къарщисса комиссиялул жаваблувсса секретарьну, Дагъусттаннал БакIчинал маслихIатчину. ЗахIматрал ххуллий лайкь дурсса орденну, медаллугу дуссар.
ЦIанакул зий ура Дагнефтьгазрал хъунаманал хъиривчуну.

Ттул кулпат даргиял-ссур­хIиял миллатраясса бур. Жул кIива душ ва ца арс ур.
Барчаллагьрай икIара та захI­мат­сса чIумал жува, дуккингу бувну, тIайласса ххуллийн бивчусса нитти-буттайн. Аьпа баннав цинявппагу ахиратравун лавгсса ниттихъалгу, бу­ттахъалгу.
– ТтурчIиял жямат­рал бусравсса вакил хIисаврай, зула жяматраягу бусарча ччива.
– ХьхьичIазаманнайва жул жямат ТтурчIайнна-Зунттуй мина дирхьуну бивкIун бур. Жул шяраваллицIух археологтуран революция хьуннинна дувссилул артифактру ляркъуну дур (ххаржан, турду, лахъи ччала ва цаймигу затру). Ми цIанагу Санкт-Петербургливсса Эрмитажрал музейраву дур. Тарихрал элмурдал кандидат Илияс Къаяевлул ТтурчIайн увкIсса чIумал жул шяраваллил хIатталлий ккаккан дуруна Гъумучиял щамхалтурал лишан дусса кIалабарзру. Хъуними никирттал инсантурал бусайва, жул халкьгу, бахIикIулгу архIал яхъанай бивкIссар тIий. Яла жу ТтурчIайнна-Зунттуйн бивзун буру. ТтурчIиял шяраваллил лакрал ва яруссаннал шяраваллащалсса дазурду дур. ТтурчIиял жямат гьуртту хьуну бур мангъул-татарнащалсса, Тамирланнущалсса, Надир-шагьнащалсса дяъвирдай. 1877 шиналсса восстаниялуву 27 ттурчIиричунал жанну харж дурну дур. Шяраву шагьидтурал хIатталугу диркIун дур. 1888 шинал цалчинсса переписьрай жул шяраву бур 134 къатта, 106 чу, 1234 яттил хIайван, 256 гъаттара.
Шагьмилов Асланбаг, мунал уссу Зайду ятIул партизантурал кьюкьраву Гоцинскийл кьюкьращал биллай бивкIун бур, яла школалий дарсру дихьлай бивкIун бур. Минная дайдирхьуссар ликбез.
Шяраву кIива мизит бивкIун бур. ТтурчIиял шярава мукьа инсан ахьтта хIажлийн лавгун ивкIун ур.
Репрессиялухьхьун къабирияншиврул, жул шяравату ливхъун, 15 хозяйство Мичиххичнаву, 12 хозяйство Андижаннай, 8 хозяйство Красноводскалий диркIун дур. Шяраву советгу, 4 класс бусса школагу бивкIун бур. ЧIявуми оьрчIру-душру гихунмайсса классру буккин Ккурклив лагайсса бивкIун бур.
Цалчинмур Лениннул орден жул шяравучу Аьлиев Мирзан дуллуну дур Мичиххичнаву ва Туркманнаву къачагътуращал иллай ивкIун тIий.
Буттал кIанттул цIанийсса дяъви байбивхьусса чIумал ТтурчIиял шярава 76 инсан увцуну ур. Миннава 28 зана къавхьуну ур.
1999 шинал хьусса дяъвилий Исяев Мутай Аьрасатнал Виричу хьунни, 12 ттурчIиричунал Чувшиврул орденну ларсунни, цаннал – кIийлла. Украиннаву нанисса хасъсса аьралий операциялийгу Мартиннул оьрчIан АхIмадлун Чувшиврул орден дуллунни. Ца яла захIматсса чIумал, мартрал 10-нний, 1944 шинал, интдайдихьулул гьантрай, Сталиннул хIукму бувну, жу Аухуллал райондалийн бизан бувну буру, мичиххичнал аьрщарайн .
– Буси тти инава каялувчину зузисса ТтурчIиял ккурандалиягу.
– Жул ТтурчIиял ккуран (межрегиональная общественная организация «Турчи») сакин хьуну 17 шин хьунни. КIира шинал хьхьичI соцсетирдайгу тIитIарду «Турчи-Даг» тIисса группа. Буссар уставгу. Тухумирттал хъунимигу бувчIуну буссар, адресру, телефоннал номерду, пишарду ккаккан бувну буссар. БувчIуну буссар диаспорардал хъунимигу.
Жу зий буссару жяматрал масъаларттаха. БивкIу-буккулий, хъатIи-хъиншивурттай чIарав бацIайссару. Цалчин жул жяматрал хъунаману увчIуну уссия МахIаммад Закаров, «Аслан» тIисса стоматологиялул центрданул директор. ХIакьсса патриотри. Ванал цува ва къуллугърая тархъан увара тIий тавакъю бувну, жяматрал чIурдайну на ивтунна. ТIайламур бусан, на нигьагуувсра, ххаригу хьура жяматрал ттуйнна дурсса вихшалалия.

Жяматрал масъалартту хьхьичIун ласлай, жагьилтуран ччан бивкIунни цалчин щаллу бан Тазиатрал къатлул масъала. Гьану бивзун 5 шинай бавцIуну буссия ва къатта Новостройрай. Ччан бивкIунни гиккува жаназа лази-лакьи дайсса къаттагу бан, чай хIачIансса кIанугу бан. ЦIуницIа проектгу дурну, гьанугу лахъ бувну, чIиртту гьаз барду. Бустаминнул арснал Санинал цала чулуха 6 азарва шлакоблок буллунни, мукунсса оьрчIругу бур. Гьашину магъи дишинсса пикри буссар. Гьурттушинна дарду ифтарданий, кумагру барду ахIвал кIюласса кулпатирттан, хасъсса аьралий операциялуву гьуртту хъанахъисса ацIния кIия ттурчIири оьрчIайх 360 азарда къуруш дачIарду.
Гьарица кумаг аьркинсса масъалалул хIакъираву жуйн буккайссар, жу, му тавакъю группалуву ххал бивгьуну, ца хIукму байссар. Аьмну дукIусса шинал 2 миллион ва 930 къуруш харж дарду личIи-личIисса давурттан. Гьашину дулланссагу давуртту чан къахьунссар.

– Ци учинна ина цIуницIа бизан баврия?
– Га чIумал хъуниминнал хIукму бувна бизан бан, шанна шинал дянив къатригу дурну, кIулли канихьхьун дулунтIиссар тIий. Ми шартIирдай бавцIуна щала ЦIуссалакрал жямат, амма му хъявринсса ишну хьунни. Бизан буллалийни буссия цала-цала жяматран компактнайну къатри данну тIий, къатригу компактнайну къадунни. Циксса хъунив хьусса халкь ливтIуну бур ххал бара, къатри даннин ялугьлай буна? Чув дур подъемнайрду, компенсацияртту кьаритлатисса къатрах? ХIасил, барткъабивгьу­сса мурадру, захIматшивуртту чан дакъар. Амма жу, цуксса захIматшиврухун багьлай бунугу, бизан бансса хIукму кьамул баву къатIайласса къабивкIссар тIий буру. Барчаллагь тIий буру Госсоветрал хъунама МахIаммадаьли МахIаммадовлуйн, жува бизан бувну тIий, кIиккува оьрму бутаву захIмат хъанай бия жун. КIиккува оьрму бутлан ялу-ялун захIмат хъанай бия, шанна шяравалу, къатригу дарххуну, ларгуна, 50 шинава лак чан хьун най бия 85%. Утти жу ТтурчIиял ккурандалул чулуха делегация бувну буссар, хъуниминначIан буххайсса, гьарца жунма аьркинсса мурадругу ххал бигьай­сса чивчуну.
– Зул, ТтурчIиял, жямат гьарца шинал зунттаву­сса зула шяравун лагару, кIикку хъамал битавансса къаттагума бувну бур тIар?
– Цуксса ххуйсса кIану бунугу ЦIуссалакрал район – аьрщи, багъру, вацIри, нехру…
1999 шиналгу жу ва хха­ссал дурссар, кIилчинмур буттал кIану кунна, оьгу экьибувтIуссар. Амма жул дакIру кIийн хъита тIийнна дур, жула буттал шяравун. КIий къабувсса жагьилтал буттал бу­ттахъал хIатталлийн лагай. Жу жула шяравун, кIийлла вертолет дургьуну, левххун лавгру, дукIу 2022 шинал 23 июльданий «ТтурчIиял кьини» дарду. Машинарттайгу 45 инсан шяравун увкIссия Кегер-ЧIухърал чулуха. 2020 шинал жагьилсса оьрчIру цачIун хьуну, стройматериалданул бувцIусса УРАЛ машинагу шяравун лахъан бувну, къатта бувну буссар кIикку инсантал уттубишин бюхъайсса.

– Ттун бавссар зул чIяву­сса хIакинтал, хаснува ккарччал усттартал, бу­ссар тIий?
– Цалчин, жул райондалий медициналул ларайсса кIулшивуртту ларсъсса цалчинсса хIакин хъанай ур Мирзоев Нуруллагь. Ванал бивзссар райондалий цIуллу-сагъшиву дуруччаврил гьану. Ва ххаллилсса хIакин эбрат хьуну, чIявуминнал, ва пиша язи бувгьуну, кIяла хялатру лархссар.
КIилчин, жул уссия ХIажиев Сиражуттин тIисса, Андижаннай ккарччал усттарнал техникум бувккусса, дяъвилул чIумал Дянивмур Азиянаву госпиталлай ккарччал хIакинну зий ивкIсса ххаллилсса специалист.

[dropcap]Я[/dropcap]ла, жу зунттава бизан бувкун, Новолакрайн увкIун, ги­кку яхъанай уссия. 1960-ку шинал ми Азирбижаннавун бивзуна. Тихун цала гъанчу буцлай, тиккува дуккин буллай, ккар­ччал хIакиннал касму лахьхьин дуллай ия.
Гъазиев Закаржа тIисса ­уссия медициналул элмурдал кандидат, биологиялул кафедралул доцент. Медициналул институтраву дарс дихьлай уссия. Мунал шайсса кумаг буллай, чIявусса жул оьрчIру-душру Мединститутравун буххайва, чIявумигу стоматологиялул факультетрайн.

ЦIанакул жул ур ца академик-стоматолог – Сяъдуллагь Абакаров, ца медициналул элмурдал доктор-стоматолог – Астемир Шайхаьлиев, ца призма- чемпион, медициналул элмурдал кандидат — Амин Закаров. Жу учару, жул ттурчIиял Сиражуттиннул учкъула гужссар гьарцаннаяр – Дагъусттаннайгу, Аьрасатнавугу, куну.

Ахирданий цал уттигу тикрал бан ччай ура цила буттал шяраваллиха ПатIимат Шагьмардановал чивчусса вай ххаругу:

Барчаллагь, буттал улчай,
щакъаливхсса барзунттив,
Вихсса ччаврил кIу дурсса
бакI лахIан дуллай бура.

Бирлиянтрал пар бусса,
гъаргъ арцул гъама бусса,
Ссалам, зунттал ттиркьюкьий,
ТтурчIиял шяравалуй!