ХIурмат лавайсса «Илчилул» редакцияй, ттул хъунмасса тавакъюри Лаккуй ччянива миналул хьусса, лакку мазгу ххаллилну кIулсса даргиричунал чивчусса вай шаммарду бищаву.
Оьрмулул яла аргъиравусса чIумал Ахъушиял райондалийсса Кулия-мащи тIисса шяравату увкIун, Шавк1уллал колхозраву хIухчуну зий ивкIун ур Ссапигулаев Рамазан. ШавкIрав учIаннина ташулул хьуну ивкIсса ванал бивкIун бур 4 душ. Яла, арсгу айрив ххал аннача куну, ва жагьилнал бувцуну бур цанма эшкьи хьусса шавкIрадушгу. Улу-гьала, муницIа увну ур яла мукьа арс. КIивагу кулпат бавкьуну, рязину яхъанай бивкIун бур.
[dropcap]З[/dropcap]унттай, ардай яттичIа усса чIумал, ваца бизар лиххан бан кунма, ванал лях-карах чичайсса бивкIун бур цанма ххуйну лавхьхьусса лакку мазрай шаммардугу.
Рамазан чIа-чIанин учIай МахIачкъалалив ттул чIаххуврай яхъанахъисса цала арсначIан, миккур ва ттущалгу кIул хьусса.
ХIусайн Давыдов,
ш. ЧIурттащи
Ттун дакIний бур
Ттун дакIний бур уттигу
Урттувух жегъир ххуллу,
ВичIан занай на бивтсса –
Эшкьилул ссуссин бувсса:
Ххуллул кIивагу чулух
Ар дурцIусса тIутIивгу,
Жулла ччаврил савлугъ дан
Балай тIисса чIелмултгу.
Цалчин хьунабавкьуний
Нава увкусса ппайгу,
Зурулу чанна лархъсса
Вил симандалул пIяйгу.
Ттун дакIний бур ялагу
Зунттул бакIрай щаращи –
Вил ва ттул эшкьи кунна,
МарцIну лирцIусса щингу.
Ччаврил хияллу
Ттуяра цIа къаданна,
Ца-кIива махъ учинна:
Вихсса ччаврил дурцIусса
Ттулла дакI дачIра данна.
Алжаннул багъравату
На вин тIутIал кацI банна.
Замзам щаращуяту
На вин щин ласун гьанна.
Ина бучIай ххуллурдай
Ххютун мурхьну ххяхханна,
Ина лагай зилучIа
Ччаврил зиярат банна.
