Муслим Даххаев увссар апрель зурул 10-нний ЦIуссалакрал райондалийсса ЦIуссаккуллал шяраву, чIявусса оьрчIру бусса кулпатраву. 1999 шинал, ЦIуссалакрал райондалий дяъвилул ишру нанисса чIумал, Муслим Даххаевлул хъуннасса гьурттушинна дурссар террористътал ЦIуссалакрал аьрщарая буккан бавриву. Тай иширттаву ккаккан дурсса чувшиврухлу лайкь хьуссар Къучагъшиврул ордендалун ва «Дагъусттаннал халкьуннал Виричу» тIисса бусравсса цIанин. Жун хъунмасса пахру буссар жула Виричуная.
ДакIнийн бутан, 1999 шинал ярагъуннил балгусса дунияллул террористътал ЦIуссалакрал аьрщарайн бувххун, ЦIуссалакрал шяравалу вив ларсъсса чIумал, РОВД-лул зузалт къучагъну данди бавцIуссар террористътурайн. ЦIуссалакрал аьрщарайри цIакь хьусса тири-хъири хьуну нанисса Аьрасатнал билаятрал цашиву. Ва плацдарм хьуссар Дагъусттанналгу, Аьрасатналгу цашиврул барашиндарал дайдихьуну. Муслим Даххаевлулли та чIумал махъра-махъсса патрон къуртал хьуннин талан амру бувсса, хIатта террористътал, ярагъ щяв бишара, зула ххуллийх гьан битанну тIий бунува. Муслимлул ярагъгу щяв къабивхьуссар, къучагъ куна талай, террористътурал шалклувату цувагу увкссар, цала зузалтгу, ярагъ ва кьюлтIсса документругу, Липецкаллал ОМОН-гу буккан бувссар. Ва дакъарив чувшиву? РОВД-лул кIия зузала аьпалул хьуну махъ Аьрасатнал Виричунал цIанин лайкь хьуссар.
Жула лакрал ва Дагъусттаннал аслансса арс увсса кьинигу барча дуллай, чIа тIий буру Муслимлун цIуллу-сагъшиву, цала чумартсса ва чувшиву ххисса дакIнин лавхьхьусса кьимат.
Барча аврицIун ххи буллай ура вай назмурдайсса цаппара ххаругу.
Вийн бивтун бур куни, нигьа къабувсру,
Оьрмулухун талай ина уну тIий.
Оьруснал гьалмахтал ясир къабуван
Ина хьхьурду дуртссар цIарал дяниву.
Мигу ххассал бувссар нитти-буттахъан,
Мюрщисса оьрчIаран, аьзиз кулпатран.
Ина дур га чIумал виричушиву,
Щалва Аьрасатнан дакIнийссар ттигу.
Хъун даву дуллуну, ина лавгнигу,
ЦIуссалак вин тачIав хъамакъабивтссар.
Мадарасса оьрчIру, формарду ларххун,
Муслимлуха лащан гъирарай буссар.
ЦIуссалакрал жямат хьунин букканну,
Даххаевхъал Муслим хьунаакьинну.
Ци ккавккун бунугу, дард мадувара,
Ви цIа-бакI илданий кьиматрай дуссар!
Зайнулла Мирзоев, ДР-лул лайкь хьусса хIакин
