Ларгсса бигьалагай кьини Ваччав щалва цIу буккан бувсса мизит тIитIлатIисса мероприятие хьунни.
Ва даврил сиптачиталну бия Ккуллал райондалул имам МухIаммад-Маннар Бариев ва Ваччиял шяраваллил имам АхIмад Рамазанов. Мажлисрал дайдихьу дуруна Кьурандалул аятирттая. ХIурмат лавайсса хIапизтурайнгу оьвкуну бия мероприятиялий гьурттушинна дуван. Миннаватусса ца ия Яманинавасса хъамаличу – Ибрагьим АхIмад аз-Зубаджи, цувагу 10 шинавусса арснащал увкIун ия. Оьрус мазгу ххуйну кIулсса ванал арснащал ккаккан бувна сценкагу. Лакрал райондалул имам МухIаммад Ссаламовлулгу, агьали барча буллай, кIицI лавгуна мизит баву чирилунсса даву душиву, барчаллагь увкуна ва бусравсса даву дуван бутIа бивхьуцириннахь.
Мероприятиялул ахирданий Барчаллагьрал чагъар буллалишиву баян бувна мизит цIу буккан баврил сиптачи ва спонсор Кьурбанов Давдин (инжитну уну, ванаща мероприятиялийн учIан къавхьуну бия).
Вара кьини Яманинавасса хъамаличу АхIмад аз-Зубаджи ва МухIаммад Ссаламов бивуна аьлимчу-динчи АхIмад Яманинал Гъумуксса зияратрайнгу.
