[dropcap]Ч[/dropcap]Iяйннал Шяраваллил магьирлугърал къатраву февраль зурул 15-нний хьусса мероприятие дия Совет аьрал Авгъаннава буккан був­сса кьинилун хас дурсса. Магьирлугърал къатраву хIасул бувну бия Авгъан дяъвилун хас бувсса мурцIу.

---

Ихтилат бунни мероприятиялул сиптачи ва сакиншинначи, ЧIяйннал Магьирлугърал къатлул хъунмур СалихIат Алхасовал. Ванил бувсунни Авгъаннал дяъвилий интернационал бурж биттур бан кьисмат хьушиву ЧIяйннал шяравасса арула жагьилнан: Аьлил Аьли­ловлун, Кьади Кьадиевлун, Лачин АхIмадовлун, Амин Пидуриевлун, ХIусайн Рабадановлун, Жамалуттин Багьовлун ва А-басир Маммедовлун.

СалихIатлул мукунна кIицI ларгунни та дяъвилий жула саллатIнал дурсса къучагъши­вуртту, дакIнийн бивчунни дяъвилий жанну дуллуми.
– Та дяъвилий жанну дуллуссар 15 азарунния ливчу­сса совет инсантурал. 1989 шинал февраль зурул 15-нний Авгъаннал аьрщарая дуркссар махъра-махъсса совет аьралуннал кьюкьа. 2010 шиная шихуннай цIакь хьуссар Интернационалистътал дакIнийн бичай­сса кьини, – увкунни СалихIат Алхасовал.

Мероприятиялий дуклаки оьрчIащал хьунаавкьунни Чехословакиянал дяъвилул иширттал гьурттучи Илдар МахIаммадов.
Шикку ихтилатру бувми бия дяъвилул чIу чувчIав къабаяннав т1ий.
Ахирданий дуклаки оьрчIа­щал рирщунни дакIний личIан­сса суратру.