Ларгсса тталаткьини Дагъусттаннал ХIукуматрал хъунаманал хъиривчу АьбдурахIман МахIмудов гьуртту хьунни Дагъусттаннал медициналул идарарттан «Анаварсса кумаграл» ц1усса машинартту ва занази ФАП-ру буллалисса шадлугърай. Шагьрурдал ва районнал азарханардал хъуними хIакинтурахьхьун кIулли дуллуна республикалул цIуллушиву дуруччаврил министр Татьяна Беляевал. «ХIакьину Дагъусттаннал шагьрурдал ва районнал азарханардайн биянтIиссар «Анаварсса кумаграл» 10 машина, чIал къавхьуну жу 4 машина уттигу машан ласунтIиссар.
Му бакъассагу, районнал азарханардан жу буллалиссару 12 медициналул комплекс, вайннул шяраваллил кIанттай медициналул зузалтрал даву чIаланну гьазгу, къулайгу дувантIиссар», – увкунни Беляевал. Вай машинартту машан лавсун бур Аьрасатнал Минпромторграл. Занази ФАП-рал бур гацIана оьттуву холестерин ва качар ххал бувайсса мини-лаборатория, ИВЛ аппарат, гьарзат аьркинмур. Вице-премьер АьбдурахIман МахIмудовлул кIицI лавгунни, 2 шинал лажиндарай, республика модернизациялул программалул лагрулий 282 автотранспортрал ва «Анаварсса кумаграл» 33 машиналул дузал дуршиву, вара программалул лагрулий гьашинугу 90 цIусса автомашина республикалул медициналул идарарттайн биянтIишиву.
