МахIачкъалалив Дусшиврул къатлуву хьунни ДР-лул НАК-рал (Национальный антитеррористический комитет) заседание. Ванил даву дачин дурну ия Аьрасатнал ФСБ-лул директорнал хъиривчу, НАК-рал аппаратрал каялувчи Игорь Сироткин.

Заседаниялий гьуртту хьунни Дагъусттаннал БакIчи Сергей Меликов. Ва дайдишин хьхьичI хъамаллурал ххал дунни Каспийскалийсса КIулшивуртту дулаврил Республикалул центрданул оьрчIал дирхьусса суратирттащалсса «Вместе против террора» цIанилусса выставка. Шиккура Республикалул Жагьилтурал министерстволул ккаккан дунни терроризмалул идеологиялийн къарши бацIаву мурадрай жагьилтурал дянив дуллалисса давуртту.
Выставкалул ца бутIану хьунни «Своих не бросаем», «Необъявленная война» тIисса В. Макаровал цIанийсса Аьралуннал савлугърал музейрал экспозицияртту. Выставка ххал дуллай бунува, Дагъусттаннал Миллатрал политикалул министерстволул вакилтурал бувсунни цукунсса давуртту дуллай буссарив республикалий террорданийн къарши бацIаву мурадрай. Бувсунни «Вирттаврал вахта» проект дузрайн ду­ккан даврия ва аьдатравун багьсса дунияллул халкьуннал дянивсса личIи-личIисса диннал вакилтал гьуртту шайсса жагьилтурал форумрая.

Заседаниялул лагрулий ххал бивгьунни терроризмалийн къарши бацIаврил масъала, ихтилат хьунни му мурадрай дуллали­сса давурттая ххишаласса мюнпат хьунсса чаран лякъаврия.
Мероприятиялул гьурттучитурал, ларгсса шинал комиссиялул дурсса даврил хIасиллугу дурну, тихуннай дулланмуния бувсунни.
Игорь Сироткиннул бувсунни, терактру дуллансса дунияллул халкьуннал дянивсса террористурал организациярду ва кьюлтIсса кюртти сакин хъанайнма бушивруцIун, Украиннал спецслужбардугу ва националист сакиншиннарду жула билаятрай диверсияртту ва терактру дан хIадур хъанай чялиш дурккун душиву.
Ванал бусласимунийн бувну, 2022 шинал хIадур дурсса 120 тахсиркаршиврун, миннувух 64 терактран, ххуллу кьукьин бювхъуну бур. Мукун, ххуллу кьувкьуну бур Украиннал спецслужбардал тапшур бувну Ухссавнил Ккавкказуллал федерал округрай дан нанисса терактран. Вайннал мурад бивкIун бур промышленностьрал, ччуччиялул ва энергетикалул комплексирттал, властьрал органнал ва аьралий инфраструктуралул, агьамсса социал объектирдал даву нирхирава ду­ккан даву.
Ва бакъассагу, ларгсса шинал ихтиярду дуруччай органнал бат бувну бур террористурал 68 кюру. Миннава бачIи Ухссавнил Ккавкказуллал федерал округрай, мукунма Дагъусттаннайгу бивкIун бур.

Аьрасатлувтал вай иширттавун кIункIу буллай бивкIун бур соцсетирдайхчин ва ларкьусса интернет-ккураннайхчин. ЧIаланну чIяву хьуну бур ларгсса шинал, теракт хьунтIиссар тIий, кIул бакъасса инсантал идарарттайн оьвтIисса ишру. Амма СКФО-лийсса паччахIлугърал структурардаща бювхъуну бур, тагьарданул ялув бавцIуну, теракт­ру хьун къаритан.
– Укуннасса даву дурну дур Дагъусттаннайгу.

Ци чулийгу, личIлулну бикIан багьлай бур, террорист организациярдал чул бувгьуми жагьилтал цала чулийн кIункIу бан чялиш бувккун бушиву хIисавравун лавсун. ЦIанасса чIумал хIасул хьу­сса тагьарданий, агьали, объектру мюхчан баву мурадрай дуллалисса давуртту цIу дуккан дан багьлай бур, – увкунни Игорь Сироткиннул.
Дагъусттаннал БакIчинал барчаллагь увкунни И. Сироткиннухь республикалун буллалисса кумаграх.

– Властьрал органнал ва ихтиярду дуруччай органнал жяматийсса ва диндалул организациярдащал цачIу чаран лякъаврийну чIаланну чан дан бювхъунни республикалий террордания­сса нигьачIаву. Тагьар ва даражалийн дуцин къахьунссия Аьра­сатнал НАК-рал аппаратрая­сса кумаг къабивкIссания. Дазул кьатIаллил гужирдал ттигу кьаст лахIинтIиссар Дагъусттаннай тагьар оьлукъин дан. МукIрура жущара цачIу Дагъусттаннай мюхчаншиву ва низам дуруччин ва ххуй чулиннайсса дахханашивуртту дан бюхъаншиврий, – увкунни региондалул бакIчинал.
Ванал кIицI лавгунни Да­гъусттаннай терактру дан бю­хъайсса объектирдайсса тагьар ххал диргьушиву ва ххишаласса чаран лявкъушиву жагьилтал террорданул ххуллийн кIункIу хьун къабитан. Мукунма, промышленностьрал, транспортрал, ччуччиялул ва энергетикалул, цIуллу-сагъшиву дуруччаврил, кIулшивуртту дулаврил объектру, чIявусса инсантал батIайсса кIанттурду мюхчан баврил давуртту гуж дуллай бушиву Республикалул Виваллил иширттал министерстволущал архIал.