ИчIаллицIунсса маслихIатру

ИчIаллицIунсса маслихIатру

Хъиннува кьавкьсса гьава заралссар

КIинттул, батареяртту, пачру лавхъсса чIумал, къатлувусса гьава кьавкьун бикIай. Хъиннува кьавкьсса гьава заралссар, хаснува мюрщи оьрчIан. Зарал­ссар мукунма ичIаллил ххяххиярттангу, хIатта луттирдан, мебельданун ва музыкалул инструментирттан.

Гьавалувусса хъатру ххал дувара

Гьавалувусса хъатру ххал дуван ишла дувайссар хасъсса прибор – гигрометр. Ва дакъахьурчан, хъатру ххал дуван хьунтIиссар ва кьяйдалий. Дяркъусса щинал бувцIусса стакан холодильникраву бишара, щин 3-5 градусрайн дагьаннин дякъинцIа бивтун, бувккун, стакан батареярттачIату (пачличIату) архну бивхьуну, стакандалул пюрундалул ялув бацIира 5 минутIрал мутталий:
– Агарда пюрундалийх, гьухъа бивтун, щинал кIунтIру хьуну, 5 минутIравун гай кьавкьхьурчан, къатлувусса гьава кьавкьссар.
– Агарда 5 минутIравунгу пюрундалийсса щинал кIунтIру кьакъавкьна ливчIхьурча, гьавалувусса хъатру, я лагь дакъа, я лахъ дакъа, дянивсса хъана­хъиссар.
– Агана стакандалийх щинал нехру дуркхьурча, гьавалувусса хъатру лахъссаннун ккаллиссар.

Кьавкьсса бухьурча

* * *
Къатлувусса гьава хъатан буван, ттучандалия ларсъсса увлажнитель дакъахьурча, батареярдал, пачлил чIарав дишара щинащалсса затру: вазарду, шушри, ччимур. Хъамамабитари чIун-чIумуй щин даххана дуван, вай диркIсса затгу шюршуну.

* * *
Гьава хъатан буван ишла дувара, суратрай кунна, батареялийн лархъсса ацци.

* * *
Гьава хъатан буваншиврул бучIиссар лагьсса цIарай щаращисса щинащалсса кIункIур битангу, щинавун пуртихалданул (апельсин) ккиригу, михакгу (гвоздика) ва эвкалиптрал аьгъушиврул ца-кIива кIунтIгу бувтIуну. Гьава чара бакъа аьркинсса хъатрулул ва тIааьнсса кьункьал буцIинтIиссар.
Щинавун дичин бучIиссар цайми затругу: корицалул ттархьру, уртту, зунна ччимур.

* * *
Гьарца щинавун бувчIтари, ягу душралун бувхни ваннайлул нуз тIиртIуну дилутира, шивасса парданул, чан-чанну тIий буклай, къатлувусса гьава хъатан бувантIиссар. Ягу щинавун бучIланнин хьхьичIра ванна цахъи кIирисса щинал дурцIуну дитира, зува бучIланнин къатлувусса гьавагу хъатан, щин цирдагу аьркинсса температуралийн дагьан.

* * *
Шюршусса янналущал­сса сушилка батарейкалул чIа­рав дишира: яннагу ччяни кьакьантIиссар, гьавагу хъатрулул буцIинтIиссар.

* * *
Гьава, марцIгу бувну, хъатан бувайссар ичIаллил ххяххияртталгу: Гьаваллавун хъатру наниссар ххяххиярттайн гьарца щин дуртIутаригу, щин вайннуйн пурх увкунигу. Щин ххяххиярттайн гьарца кьини дутIлан къабучIихьурча, чIапIайн пурх дулланнив бучIир гьар кьини, ванийнугу гьава хъатан буллай.

* * *
Гьава хъавтун ва марцIну бикIаншиврул, гьарца кьини лакьияра къатта (хъартсса уборка).
* * *
Гьава хъатан буван чIавахьулу тIитIин бучIиссар гъарал ларчIун махъ ягу къатта хьхьиричIан гъанну бухьурча.

* * *
БучIиссар гьантлун 2-3-лла пульверизаторданува гьаваллавун щин пурх дуллангу.

Р.S. Амма хъамамабитари хъиннува хъавтсса гьавагу (70% ххишаласса) заралшиву, хъиннува кьавкьмур кунма. Ххисса хъатру сававну аллергия, личIи-личIисса азарду сукку хьун бюхъайшиву.

Читайте также: