Аьрасатнал лагрулийсса форум Гъумучиял школалий

Аьрасатнал лагрулийсса форум Гъумучиял школалий

Ларгсса шинал декабрь зурул ахирданий Гъумучиял школалий хьунни дуккаврил оьрмулуву агьамшиву хъуннасса иширан ккалли дан бучIисса мероприятие. Ва дия дуклаки оьрчIал ва студентътурал дянивсса, щалагу Аьрасатнал лагрулийсса форум «Роль деятельности Министерства внутренних дел в профилактике правонарушений среди молодежи».


Цувгу сакин дурну дия Аьра­сатнал паччахIлугърал юстициялул университетрал (РПА- Минюст РФ), ДР-лул МВД-лул, муничIасса Жяматийсса советрал, райондалул администрациялул ва Гъумучиял школалул цачIуну.

Муний гьуртту хьунни ДР-лул МВД-лул бакIчи Аьвдурашид МахIаммадов, Аьрасатнал паччахIлугърал юстициялул университетрал Ростоврайсса филиалданул директор, профессор, ДР-лул лайкь хьусса юрист Багьауттин МахIаммадов бакIчисса ацIния кIия инсанная сакин хьусса делегация: психологиялул элмурдал доктор Анжелика ЦIаххаева, ДР-лул МВД-лул подполковник АьвдурахIин Арзуманов, ДР-лул МВД-лул жяматий­сса советрал председательнал заместитель МахIаммадссалам МахIаммадаьлиев, ЧIарадиял, Гъуниннал, Ккуллал районнал дуккаврил управлениярттал вакилтал, низам дуруччай органнал зузалт ва дуклаки оьрчIру.

Цала ихтилат байбихьлай, Лакрал райондалул бакIчи Юсуп МахIаммадовлул барчаллагь увкуна ва мюнпат хъунмасса форум Гъумук дан савав хьуминнахь, бувкIсса хъамаллурахь, му хIадур дурминнахь, хаснува Багьауттин МахIаммадовлухь.Ванал кIицI лавгунни ялун нани­сса ник, жагьилтал, студентътал ххуттава личин къабитавриву, ми багьайкун тарбия бавриву МВД-лул къуллугъирттахь цуксса хъунмасса бияла буссарив. Мяйжаннугу, ихтиярду дуруччай органнал, школалул, кулпатрал чулуха профилактикалул давуртту цила чIумал къадулларча, чIирисса низам зия давурттугума тахсиркаршивурттайн кIура даен бюхъайссар. Мукун хьун къабитансса чаранну ляхълан багьлай бур жяматран.
ХIакьинусса даврил агьамшиву жун хъиннура асар хъанай дур ва форум Дагъусттаннал БакIчи Сергей Меликовлул Дуккаврил шинну баян бувсса 2022 шинал ахирданий, хьхьичI шинал тIивтIусса, гьарца ттизаманнул аьркинмунил лащу-щаллусса Гъумучиял школалий дуллай бушиву, – увкунни Юсуп МахIаммадовлул.

Мяйжаннугу, бувкIсса хъамал хIайран хьуну ливчIун бия зунттал райондалий укун гьартасса, аьркинмунил дузал­сса жанахIру, кабинетру, спортзал, столовая бусса школа ххал хьуну.
Муния махъ Ухссавнил Ккав­кказуллал институтрачIасса колледжрал студентка Юлдуз Жабраиловал бувна Дагъусттаннал жагьилтал Аьрасатнал Виричу ХIусманов МахIаммад Жамалуттиннул арснал эбратрай тарбия баврин хас бувсса доклад. Бувсуна ганал оьрмулул лахIзардая, къучагъшивурттая.
Ростовуллал юридический колледжрал студентка София Андреевал доклад хас бувну бия информациярдал технологияр­ттал агьамшиврун.
Гьарза-гьартасса ихтилат бунни АьвдурахIин Арзумановлул.

Ихтилатру бувна ЧIарадиял, Гъуниннал, Лакрал ва Ккуллал районнал дуклаки оьрчIал ва студентътурал.
ВичIи дирхьуминнан ххуй бивзун бия КIундиннал школалул 10-мур классрал дуклаки душ Илада Ибрагьимовал «Обеспечение информационной безопасности молодежи как одно из актуальных направлений деятельности органов МВД» тIисса доклад. Докладрал тема дурчIинну, хъинну дюхханну аьч даврищал, залданува буллусса хъинну куртIсса мукьва суалданунгу дакI дакьинсса жавабру дуллуна ванил. Багьауттин МахIаммадовлул, КIундиннал школалул каялувчитурахь ва учительтурахь барчаллагьгу куну, тавакъю бувна райондалий ванин багьайсса кьимат бищун.

Багьауттин МахIаммадовлун дакI даркьуну дия райондалий дуккаврил иширттах дагьайсса къулагъас душаврий. ЧIурчIав дурунни ва агьамсса форум Гъумук дан бювхъушиврий шикку ххаллилсса школа бушиврийн бувну.
Ахттая махъ хьунни секциярдал давурттугу.
Форумрай дакI дакьинсса докладру бувминнан ДР-лул МВД-лул ва форумрал Президиумрал чулуха буллунни Барчаллагьрал чагъарду, дипломру, сертификатру.

Читайте также: