Вай гьантрай Ккурккуллал школалий хьунни цIанихсса шаэр, ххаллилсса педагог, зувиллийхъайсса шиннардий ва школалий каялувшиву дуллай ивкIсса Даниял Магьдиевлул аьпалул вечер. Ва хIадур дурну дия школалул учительтал Гульнара Магьдиевал, Изольда Гъужиевал ва ПатIима Чупаловал. Классрал чIирайн лархъун дия Данияллул суратращалсса ва ванал махъру чивчусса баннер. Дурну дия ванал луттирдал выставка. Утти школалий мудан бикIантIиссар Данияллун хас бувсса мурцIу.

Школалул директор Кьурбан Гъужиевлул ва учительтурал Даниял дакIнийн утлатисса махъру лавхъун махъ, дуклаки оьрчIал ккаккан бунни «Ниттил чагъар» ва «Аьли ва Мариян» тIисса ванал поэмардайнусса парчри, бувккунни Данияллул шеърирду. Учительтурал ва оьрчIал хIадур бувну бия ванал оьрмулул лахIзарду ккаккан буллалисса видеороликру.
ДакIнийн бутан, Даниял Магьдиев зий ивкIссар Ккурккуллал школалий 1974-ку шиная айивхьуну: 1974-1977 шиннардий — оьрус мазрал ва литературалул учительну, 1977-1982 шиннардий — завучну, 1982 шиная 2017 шинайн ияннин — директорну.
Ванияр кIира шинал хьхьичI, декабрь зуруй, чIун дакъасса бивкIулул личIи унни жуятува жул ххирасса учитель. Цими шин гьарчагу ва жуна мудан дакIний икIантIиссар.