Ноябрь зурул 29-нний яруссаннал «ХIакъикъат» кказитрал редакциялий журналистътал хьунабавкьунни Къарачай-Чаргаснавусса Дагъусттаннал вакил МахIаммад МахIаммадовлущал.
КIицI лавгсса кказитрал хъунама редактор Зульфия ХIажиевал бувсунни МахIаммадов 2000-ку шиная шийнай зий ушиву Къарачайнавусса Дагъусттаннал вакилну, цал – постпреднал хъиривчуну, 2003-ку шиная шийнай, постпредну. Журналистътурал суаллахьхьун жавабру дуллай, ванал бувсунни Къарачайнаву бушиву ххюазарунниха ливчусса инсан усса Дагъусттаннал диаспора, миннавугу чIявуми лак бушиву. Бувсунни лак хъунмурчIин зий бушиву усру дувай цехирдаву ва ссяткарталну.
Сайки ряхттуршунниха ливчусса дагъусттанлувтал тайннал республикалий мюрщисса ГЭС-ру буллай зий бусса бур. Къарачайнал аьрщарай яхъанахъисса Дагъусттан агьалинал дусшиву цIакь дувансса культуралул давурттая буслай, кIицI ларгунни халкьуннал шаэр Расул ХIамзатовлул юбилей хIисаврайсса мероприятияртту. Дагъусттаннал хъунасса шаэрнал назмурду ккалаккисса конкурс хьуну дур дуклаки оьрчIал дянив.
Культуралул мероприятиярттавух кIицI ларгунни халкьуннал шаэр Фазу Аьлиевал юбилейрацIун дархIумигу. Экономикалул, машлул дахIавурттая буслай, к1иц1 лавгунни Дагъусттаннайн бучIайшиву тайннал цемент, жучIатувагу тIалавну бушиву цIувцIучаругу, лухIи варсивгу. Бувсунни Къарачайнавасса оьрчIру уква Дарбантлив бигьалавгшиву, Дагъусттаннаясса оьрчIругу кIира нюжмардий Домбайрай, Тебердалий бигьалавгшиву.
Журналистътурал кIира республикалул арарду цIакь дуваврил хIакъиравусса суаллу чIявуя. Нагу буллуссия хъамаличунахьхьун, лак чIявусса бухьувкун, лакку мазрайсса «Илчи» кказит тIалав буллали бувансса иш буван къахьунссарив куну. Бувсъссия пучрайхчIин жува гьарца нюжмардий кказит Аьрасатнал цайми регионнайнгу тIайла буккайшиву, подписка республикалул кьатIув ххирасса дунугу, миллатрал кказитрал кьимат кIулну бучIан буллалими тамансса бушиву. Ванал махъ буллунни Къарачай-Чаргаснавугу «Илчи» тIалав буллансса лак лякъин, мукунма цайми кказитирттал ва диаспоралул дянив дусшиврул ламу бишинсса хIарачат буллан.
