Уттигъанну Дагъусттаннал ХIукуматрал хъунама Аьбдулмуслим Аьбдулмуслимовлул ХIурматрал грамота дуллунни МахIачкъалаллал «Ветеран» тIисса бугьараминнансса ва мушакъатминнансса интернатрал хъунмур медсестра Асият Дукиеван.

Ва 1-мур ЦIувкIратуссар. Цуппагу ттущал архIал ца классраву дуклай буссия. АрхIал дуклай бивкIминнащалсса хьунабакьавурттай Асиятлул хъунмур ихтилат бикIайссагу цачIавасса къари-къужраятур: цума ссал къашавай уссарив, цуманал цукунсса хасият дуссарив. Ванил чIявуну миннаяту бусласаврил жунгума интернатрал бачIи агьлу кIулссар, Асиятлущал архIал къума лагайссару, пулан дунияллия лавгсса хавар баярча. Кувний жу ванийн дяъвангума бикIару, бити ми вилва къужрича, цамур тема сукку дува тIий. Жугу кьабивтун, даврийн лавгсса ишругу шайссар, цума-унугу къужлучIан, къаричIан биян багьлай бур тIий. Учарухха, цIуцIи шанийн агьарча, дакI цIимисса цIимилул чувначIан агьаннав куну.

Ва АсиятлуцIун даркьусса калима дур. Ургала акъа ливчIсса ягу цайми сававрттайн бувну интернатрайн багьсса бугьарасса инсантуран тIивтIусса мурцIур ва. Хаснува коронавирусрал эпидемия дусса ппурттуву дакIний бур Асият, интернатравусса 67 инсаннава 35 шания къаизайсса ур, миннал гьутрурду щякъабикIаншиврул ччя-ччяни занабитлай буру, миннайн азар къадиян ялув бавцIуну буру тIий, зурдардий карантин баян бувну, интернатрава бувагу кьатIув къабуклай бивкIсса. Буниялттунгу чувшиврул ххуллийсса даву дуллай бия вагу, щалва коллективгу та ппурттуву, мушакъатсса ва бугьарасса инсантал азардания буручлай. Интернатрайн даврийн буххан ччива тIисса инсаннахь Асиятлул увкумургу дакIнийри: «Ина хIадурну бурав хъювсулнувасса, мюрщисса оьрчIайн бувксса, шануцIунгу лавчIсса, чIивисса иширайнгума ссибизан, дяъван хIадурнувасса инсантуращал ссавурданий ва дакI цIуцIаврий зун? Бухьурча, бухьхьу жучIан. Цамур куццуй жучIа зун къахьунтIиссар». Гьамин, ссавурданул ва ххуй­сса дакIнил заллу бакъассания, къалахъи лаганссия Асият цуппагу шикку. Ванил 1986-ку шинал Ташауз областьрал медициналул училище къуртал бувну бур, медициналул даврий зийгу 35 шин хьуну дур. Ванил даврил биялсса опытгу бур, лаваймур даражалул пишакаргу бур. Ва кIицI лавгсса интернатрал директор Мажид Мирзаевлул бувсмунийн бувну, Асият Дукиевайн сивсуну вихшала дуван шайсса дур хIакиннал дувайсса гьарцагу даву.

– Гьар кьини кIюрххила ванил обход дувайссар, дуки-хIачIиялулсса буллалисса блокрал ва медперсоналданул ялув бавцIуну буссар. ЦIуллушиву дуруччаврил идарарттал пишакарталгу кIункIу бувну, ванил интернатраву яхъанахъиминнан диспансеризация дувайссар, мукунма азарханалий уттуишин уван багьлагьисса иш бухьурча, Асиятлул бакIрайн ласу бувайссар. Мукунма мушакъатманан инвалидшиврул группа цIакь буваврил, вайннал дакIру таза дуккан дувансса культуралул мероприятиярттал хъаргу ванийри дусса. Интернатравусса бугьараминначIа бикIу, коллективрачIа бикIу, Асият Дукиевал хIурмат лавайссар», – тIий ур Мажид Мирзаев.

Ва уттинингу лайкь хьуну бур ЗахIматрал ва социал иширттал министерствалул чулухасса ХIурматрал грамотарттангу, ХIурматрал лишаннангу. Ванил наградарттаву утти ххи хьунни чIярусса шиннардийсса захIматрайну лайкь дурсса Дагъусттаннал ХIукуматрал чулухасса ХIурматрал грамотагу. ДакIнийхтуну барча т1ий, Асият мяйжаннугу жулва заманнул виричури тIий бура. ЛичIи-личIисса сававрттайн бувну Ветерантурал къатлувун багьсса ялгъуз-гъаривсса инсантурал буса-учаймуних вичIидиширча, Асият вайннансса чаннал тIимугур, тирххандарал мурцIугур. Асият кунмаминнайри ва дуниял дарцIуссагу.