АьвдурахIманнул арс Расулов Гьарун

Уттигьанну, оьрмулул 77 шинаву, захIматсса азардануща ххассал къавхьуну, аьпалухьхьун лавгунни дакI-аьмал хъинсса, инсантуращал хIал бавкьусса, цува зузисса коллективраву хIурмат лавайсса, ЧIяйннал жяматран ва Буйнакск шагьрулул агьалинан хъинну бусравшиву дусса, АьвдурахIманнул ва Султанатлул арс Гьарун.
Шяраву 10 классгу къуртал бувну, Гьарун лавгун ур Каспийск шагьрулийн «Дагдизель» заводрай зун. ЧIал къавхьуну гичча, 1964-ку шинал, армиялийн увцуну ур, щупирнал пишагу лавхьхьуну, шанна шинава зана хьуну ур ма­хъунай. Гания махъ Буйнакск шагьрулий «Агрегат заводрай» зий айивхьуну ур. ДакIнийхтуну бихьлахьисса захIматрайну, рабочийная мастернайн ияннин зий, хIукуматрал ванан бивщуну бур лахъсса кьимат. Цалчин ва лайкь хьуну ур захIматрал ветераннал цIанин. 1980-ку шинал Гьарун лайкь хьуну ур «Ударник коммунистического труда» цIанин, 3-мур даражалул «ЗахIматрал славалул ордендалун»
Ва 1971-1975-ку шиннардий увчIуну ур ДР-лул Верховный Советрал депутатну. 1975-1979-ку шиннардий Буйнакск шагьрулул советрал депутатну. Махъсса 25 шинай зий ивкIун ур «Рембыттехникалий» машинарду ххуй буллай, сир буклай. Цува ва даврил ххуйсса ус­ттар ушиву шиккугу чIалачIи бувну бур ванал.
Гьарун жяматраву ва дустураву хъанахъисса ххарисса ва пашмансса кьинирдай мудан чIарав ацIайссия.
Гьарун дунияллия лагаврил кьурчIишиву кIидачIлай, жижара буллай буру ванал кулпатрахь Маликатлухь, оьрчIахь МахIаммадлухь, душваврахь, оьрчIал оьрчIахь, цинявппагу мачча-гъаннахь. Цал гьав нурданул дуц1иннав, бунагьирттал аьпа баннав, рухI бигьаний дишиннав, алжаннул ххари аннав. Амин!
ЧIяйннал жямат

Хъуннасса пашманшивугу кIидачIлай, дакIнийхтунусса жижара буллай буру Зиябуттин ХIажимирзаевлухь, ванал ххирасса бу­ттауссу
Асадуллагь
аьпалухьхьун лагаврийн бувну. Цал бунагьирттал аьпа баннав, рухI бигьаний дишиннав.
«Илчилул» редакция