Лакрал байран Москавлив

Лакрал байран Москавлив

Ноябрь зурул 12-нний Москавуллал миллатирттал къатлуву хьунни Лакрал байран. Унгу-унгунусса цурдагу. БувкIцириннан лакрал багьу-бизу, тарихрал лахIзарду, аьдатру, лаххия, гьаннайсса, фольклор ва культура ккаккан дурсса. Ва даврил сиптачину дия Москавливсса лакрал жагьилтурал ккуран (ММОЛ «Лакия»).

2015-ку шинал хIасул дурсса ва ккурандалий каялувшиву дуллалисса Жамалуттин Оьмаровлул, бавтIцири барча буллай, кутIану бувсуна ккурандалул дурцири давурттая ва гьануми мурадирттая. Найбунува кIицI лаганна, ккурандалул активистътурал байрандалий гьуртту хъанахъими лакрал тарихравун буцинсса программа авадансса, жура-журасса номерду бусса диркIшиву. Масалдаран, ххуйсса даражалий хIадур бувну бия лакрал хъамакъаитайсса чичу ва драматург Казбек Мазаевлул «Удрида бава» тIисса спектакльданувасса парча. Халкьуннал шаэртурал Салимат Кьурбановал, Фазу Аьлиевал ва лакрал шаэр МахIаммад-Загьид Аминовлул шеърирду бувккуна активистътурал.

Аьлиева Дианал ва Рустамлул каялувчишиву дуллалисса «Kavkazdance» къавтIаврил школалул ккаккан дурна лакрал къавтIавуртту. Мероприятие дачин дурну бия Ломоносовлул цIанийсса МГУ-рал аспирант, Арсланнул арс МахIаммадов Аьбдулкьадир ва Дагъусттаннал университетрал культуралул факультет къуртал бувсса, ХIусайннул душ Мусаева Тамара. Ва «Лезгинкалул» школалий хореографнугу зий бур, Москавливсса школалий хореография ва актертурал искусство оьрчIан лахьхьин дуллай бур. Аьбдулкьадир МахIаммадовлул дунияллий циняв мюрщисса миллатирттал мазру ябаврил тема аьч дуллалисса докладгу бувну бур. Байран чIюлу дурна ПатIима Аьбдуллаевал (Фатима Лакия) лакку мазрайсса балайрдал. Москавливсса Дагъусттаннал Культуралул центрданул президент, профессор Арсен ХIусайновлул барчаллагь увкуна мероприятие лахъсса даражалий тIайла дуккан биялсса захIмат бивхьусса жагьилтурахь, ва хасну Жамалуттин Оьмаровлухь.

Ванал бувсуна декабрь зурул 2-нний Москавливгу лак лакку мазрайсса диктант чичин хIадур хъанай бушиву ва жагьилтурайнгу оьвкуна ва давриву гьуртту хьун бухьхьияра куну. Вава Культуралул центрданул вице-президент, цалчинмур ранграл капитан, профессор ХIусман-ХIажи Аьлиев­лул залданувун бавтIцири таза буккан бувна, цува флотрал хIаписар хIисаврай 35 билаятрайн ивссара, 4 шинай Авгъанисттаннаву ивкIссара, амма лакрал душру кунма бакI-чурххал бювхъусса душру бакIрайн къабагьссар куну. Аьрасатнал Президентнал Дагъусттаннал Постпредствалул вакил Зоя Хановал, бавтIцири Постпреднал цIанияту барча буллай, кIицI лавгуна лакрал миллатрал гъурбатрайгу хIарачат бикIан аьркиншиву ниттил маз ва культура ядуван, ниттил мазрахсса ва лакку улклухсса ччаву жагьилтураву цIакь хъананнав, лакрал ташурду чIяву хъананнав, лакку мазрай гъалгъа тIутIисса лакку оьрчIру гьарза хъананнав увкуна. Ванил барчаллагь увкуна ниттил маз ва культура яшаврил ххуллийсса давуртту дуллалиминнахь, хаснува жагьилтурахь.

Патимат Рамазанова

Заслуженный работник культуры РД

Читайте также: