Зиябуттиннул арс ХIажимирзаев Асадуллагь
Вай гьантрай оьрмулул 88 шинаву аьпалухьхьун лавгунни ГьунчIукьатIрал шяравасса бусравсса хъуначу, захIматрал ветеран, Зиябуттиннул арс ХIажимирзаев Асадуллагь.
Асадуллагь увссар 1934-ку шинал ноябрьданул 12-нний. Ванал щала оьрму машиналул рульданух лавгссар. 1954-ку шинал армиялийн увцуну, щупирнал пишагу лавхьхьуну, Балтикалул флотрай машиналий зий ивк1ссар 4 шинай, цала аьралий бурж лахъанцIа. Кулпатгу бувну, яла 10 шин дурссар Къиргъисттаннал Ош шагьрулий, зунттал районнайх маэшатрал аьмсса кьай хъунма машиналий ххилай. Дагъусттаннайн зана хьуну, пенсиялийн укканнин республикалул шагьрурдал ва шяраваллал дянивсса маршрутирттайх заназисса автобусрай зий ивк1ссар.
Вана укун, оьрмулул 80 шин хьуннин, 60 шин ххишалагу дурссар Асадуллагьлул машиналий зий. Ванал цалва захIматрал ххуллу Дагъусттаннал зунттал- гу, Памир зунттулгу районнайх занай, кьанив, шагьрурдай зий-захIмат буллай бивтссар.
Махъсса даврия (Хлебозаводрая) пенсиялийн нанисса чIумал Асадуллагьлун ва заводрал коллективрал, дак1нийхтуну бувсса зах1матрахлу, цува зий ивкIсса машинагу пишкаш бувссия. Асадуллагьлул цала даву щилчIав аьй къарищунну, лажин кIялану биттур дувайва. Мунияту ванал хIурматгу даврил хъуниминначIа ва архIал зузиминначIа лавайсса бия.
Асадуллагь хъунанащалгу, ч1ивинащалгу, ятиннащалгу, къуллугъчинащалгу ца куццуйсса икIайва. Ва гьалмахтал ххирасса ия, дусшивугу дуруччин кIула.
Асадуллагь жяматран бусравсса, дакI-аьмал ххуйсса, хъинсса, ка тIиртIусса, лагмацириннащал хIал бавкьусса уссия.
Ванан шяравалугу, жяматгу ххирая. Асадуллагьлул дакI кIункIу тIийнна дикIайва буттал миналийн. Пенсиялийн уккайхту, гьаршинах инттуя ссуттилнин шяраву оьрму бутансса чIун лякъайва. Асадуллагь ккурчIав ххал шайхту, дакIниву тIааьнсса асар шайва.
Ванал аьпалухьхьун лавгсса цала кулпат Мирзанатлущал арс ва душ лайкьну хъуни бувссар.
Асадуллагьлул бивкIулул хъуннасса пашманшивугу кIидачIлай, дакIнийхтунусса жижара буллай буру арснахь Буттахь, душнихь Фаризахь ва махъсса цинявппагу гъан-маччаминнахь. Цал рухI паракьатний дишиннав, имандалий лавгун лякъиннав, ванан къабуллусса оьрмулул бутIа махъминнан ххи баннав!
ГьунчIукьатIрал ккуран
НурмахIаммадлул арс ХIасанов Оьмари
Уттигъанну, оьрмулул 84 шинаву, аьпалухьхьун лавгунни бусравсса хъуначув, захIматрал ветеран, КIулушацIрал шяравасса НурмахIаммадлул ва Аьбидатлул арс ХIасанов Оьмари.
Гъумук дянивмур даражалул школагу къуртал бувну, Оьмари увххун ур Каспийскалийсса «Дагдизель» заводрайн 27-мур цехравун слесарьну. Тичча увцуну ур аьралий къуллугъ буллан. 1960-ку шинал аьралий буржгу биттур бувну, зун ивкIун ур гава заводрай 5-мур цехраву слесарьну. Зий унува къуртал бувссар Москавлив заочнайну Машиностроительный институт. ЗахIмат ххирасса, даврил усттарсса Оьмари цала бюхъулийну, хIарачатрайну, слесарьная айивхьуну, 37-мур цехрал хъунаманал къуллугърайн лавхъун ур. Ялагу чIярусса шиннардий зий уссия вава заводрал завкомну.
1991-ку шинал увчIуссар ГК КПСС-рал кIилчинма секретарьну. Амма, лахъи къалавгун, махъунай тIалав увну, гава заводрал «Охрана труда и техники безопасности» отделданул хъунаману ивтссар. Зий уссия шикку, 20-хъайсса шиннардий, пенсиялийн укканнин.
Гьаннайсса, щала оьрму Оьмарил хас бувссар «Дагдизель» заводран. Ккаккан бувссар цува инсантуран хъинбала бан ччисса, дакI марцIсса, гьарцаннащал хIал бавкьусса, уздансса чув-адамина ушиву. МуницIун ва ххуйсса къатлул заллугу ия, ххаллилсса оьрчIал ппугу ия.
Оьмари жуятува лагаврил хъуннасса кьурчIишиву кIидачIлай, жижара буллай буру ванал кулпатрахь, арсурваврахь, душваврахь, ссурваврахь, гъан-маччанахь цинявннахьвагу. Цал гьав нурданул дуцIиннав, пирдавс алжан нясив баннав. Махънал оьрмурдай барачат бишиннав.
КIулушацIрал жямат
Уссил Ширванинал
аьпалун
МукьцIалла шин оьрмулул
Шахталий зий гьан дурну,
Шахталул больницалий
Жан дуллусса Ширваний.
Уссай, жул кIяла бюрний,
Гъагъан дував жул дакIру,
Ина учIай ххуллурду
ЛухIи ххиттул бавкьунни.
Щюлли хьхьирийх бивгьуну
ЖучIан бучIай лелуххи,
Гьалак щатIив бивщуну,
ЩатIал лавсун лавгунни.
Хъамакъаитайссара,
Ххира уссай Ширваний,
Жун чани бай чирахъну
ДакIурдиву уссара!
ЦIаххаева Маликшихан,
ш. Читтур
