Ноябрьданул 9-нний цалва оьрмулул 55 шин кIицI ларгунни медициналул элмурдал доктор, Дагъусттаннал паччахIлугърал медициналул университетрал госпитал терапиялул 1-мур кафедралул профессор Маммаев Сулайман Нураттиннул арснал. Цалла дуллалимур мудангу оьрмулуву «ххювардайну» бартдигьлагьисса СулайманнуцIун вай кIива «ххювагу» ххишала бакъа ххуйну бавкьуну чIалай бур.

Увну ур Сулайман 1967-ку шинал Гъумук цIанихсса педагог Нураттиннул ва Басиратлул кулпатраву. МарцIсса ххювардай Гъумучиял дянивмур даражалул школагу къуртал бувну, 1984-ку шинал увххун ур Дагъусттаннал паччахIлугърал медициналул институтравун. 1986-1988-ку шиннардий армиялий къуллугъ буллайгу ивкIун, зана хьуну, гихуннай дачин дурну дур институтравусса дуккаву ва, мугу щаллу дурну, 1992-ку шинал кIунттил бувгьуну бур ЯтIул диплом. Вания гихуннай – ординатуралувусса 2 шинайсса дуккаву. Хъирив – цалва бувккусса институтрал виваллил азардал 3-мур кафедралул ассистент, медициналул элмурдал кандидатшиврийнсса ди­ссертация дуруччаву, И.М. Сеченовлул цIанийсса Москавуллал медициналул академиялул докторантшиву, хъиривра – медициналул элмурдал докторнал цIа дуруччаву.
Лавхьхьумуний, кIулмуний гьашиву дурну къаацIайсса, мудангу хьхьичIунай хъит тIисса Сулайманнул захIматрал ххуллу бур цаннияр ца хьхьичIунсса иширттал авадансса. 2004-ку шинал, Аьрасатнал Федерациялул КIулшиву дулаврил министерствалул хIукмулийн бувну, ванацIун цIакь дурну дур госпитальная терапиялул кафедралул доцентнал цIа, 2007-ку шинал – кафедралул профессорнал цIа.
Дагъусттаннал паччахI­лугърал медициналул академиялуву личIи-личIисса къуллугъирттай зий, Сулайман Нураттиновичлул цува чIалачIи увну ур ххаллилсса специалистгу, каялувчигу ушиву. Дагъусттаннал паччахIлугърал медициналул академиялул виваллил азардал 3-мур кафедралул ассистент, госпитальная терапиялул 1-мур кафедралул ассистент, доцент, профессор, дуккаврил ва тарбиялул даврил цалчинма проректор. 2007-2013-ку шиннардий – Дагъусттаннал медакадемиялул дипломрая махъсса хIадур баврил проректор. 2011-ку шиная айивхьуну, цIанагу – госпитальная терапиялул 1-мур кафедралул заведующий.
2016-ку шиная 2021-ку шинайннин Сулайман Нураттинович ивкIссар Дагъусттаннал паччахIлугърал медициналул университетрал ректорну. Вай шиннардий шикку хьуссар хIисав ласайнан къахIисав хьун къабюхъайсса, Щалагу Аьрасатнал даражалийсса дахханашивуртту, ванал каялувшиву дуллалисса вуз гьаз хьуссар паччахIлугърал яла хьхьичIунсса ацIва вузрал кьюкьлувун.
Та-ухьурчагу Сулайман Маммаев, багьайсса куццуй цалла агьаммур даву даврицIун, хьхьичIунну жяматиймургу дачин дурсса, дан кIулсса инсан ур. 2004-ку шиная тIайла хьуну, цIанасса чIумалгу ва хъанахъи­ссар РГА-лул (Российская гастроэнтерологическая ассоциация) член, мукуна медициналийн багьайсса цаппарасса журналлал редакциярттал член, РОПИП-рал (Российское общество по изучению печени) региондалул отделениялул председатель, РНМОТ-рал (Российское научное медицинское общество терапевтов) Дагъусттаннал отделениялул председатель. 2012-ку шиная шийнай Сулайман Маммаев хъанахъиссар Аьрасатнал Федерациялул ЦIуллу-сагъшиву дуруччаврил министерствалул СКФО-райсса штатрай акъасса гастроэнтеролог.
Ванал кIунттила бувккун бур хъуннасса агьамшиву дусса 460 элмийсса захIмат. Ванал хIадур увну ур 13 элмурдал кандидат, ишираву, давриву зузи дурну дур цIусса цимирагу кьяйда. Сулайман Нураттинович ур Дагъусттан Республикалул элмулул лайкь хьусса иш­ккакку, ДР-лул цIуллу-сагъшиву дуру­ччаврил отличник. Ванал цалва марцIсса захIматрайну хIалал дурсса наградарттавух дур Ширвинскийл медаль ва ттигъанну дуллусса Н.И. Пироговлул цIанийсса орден.
Ччянива Черчиллул увкуну бур: «Лелуххант мурчайн къаршину левххун нанисса чIумалли хъиннува бюхттул шайсса», — куну. Жун вай махъру Сулайман НураттиновичлуцIун ххишала бакъа бавкьуну чIалай бур.
Барча вил юбилей, хIурмат бусса Сулайман Нураттинович! Яаннав ина Заннал винагу, инава ххираминнангу, щалва лакрал илданунгу, Дагъус­ттаннангу!