Каспийскалий, «Азимут» гостиницалул залдануву, хьунни «Терроризмалул цIусса журарду, ттизаманнул шартIирдай миннуйн къаршину бацIансса чаранну» тIисса цIанилусса регионнал дянивсса элмулул ва практикалул конференция. Ванил сакиншинначину хьунни ДР-лул Информациялул ва печатьрал агентство.

Шикку гьуртту хьунни Да­гъусттаннайсса АТК-лул Экспертътурал советрал вакилтал, исполнительная властьрал органнал каялувчитал ва зузалт, республикалул СМИ-дал редактортал ва журналистътал.

Конференциялул даву тIитIлай, ихтилат бунни Да­гъус­ттаннайсса Террорданийн къаршисса комиссиялул аппаратрал хъунама Далгат Фейзуллаевлул. Ванал бувсунни, хIакьину Дагъусттаннайсса тагьар цалий дарцIуну духьурчагу, ттизаманнул интернет-пространствалиясса нигьачIаву хъуннасса душиву, СМИ-дал бияла хъунмасса бушиву чIалай, террористътурал ми чялишну ишла дан хIарачат буллай бушиву. Ттизаманнул терроризмалул ляличIишивугу му дур – информациялул пространствалийхчIин инсантал цала тIутIимунийн кIункIу баву.

– Жунма чIалай бур кьа­тIа­тусса личIи-личIисса гужру Дагъусттаннайсса тагьар оьлуккин дан хIарачат буллай бушиву, жагьилми гьалак буккан буллай, рязи бакъасса акциярдайн гьуз учин буллай бушиву. ПIякь бивкIун чIалачIисса зат бур информациялул терроризмалия миллатрал мюхчаншиврун хъуннасса нигьачIаву душиву, – увкунни Д. Фейзуллаевлул.

Терроризмалул идеологиялийн къарши бацIаву мурадрай Дагъусттаннал Информациялул ва печатьрал агентствалул цукунсса даву дуллай буссарив бувсунни ведомствалул каялувчинал хъиривчу Аслуттин МахIаммадовлул. Ванал кIицI лавгунни терроризмалул хъунмасса щавщи биян буллай бушиву кIулшивуртту дулаврил процессрайн. ЧIявусса Аьрасатнал школардай минарду дирхьуну дуссар тIий баян буллай, оьрчIру эвакуировать буллан багьшиву. Координациялул, информациялул ва культуралул центрданул каялувчи Мухтар Амировлул бувсунни соцсетирдавусса тIайла бакъасса (фейковые) хавардая, ми цукун ппив хъана­хъиссарив обществалуву.

Конференциялий ихтилатру бунни Аьрасатнал цайми регионнаясса спикертуралгу. Аьрасатнал исламовед ва политолог Яна Амелинал видеосвязьрайх бувсса докладраву бувсунни Западрал хIарачатрайну СНГ-лул билаятирттай гуж къабувну дурсса революциярдал кьяйдардая ва сценарийрттая.

Тарихрал элмурдал кандидат, Кемеровуллал медициналул университетрал историялул кафедралул доцент, «Вестник общественных и гуманитарных наук» элмийсса журналданул хъунама редактор Вадим Шиллердул бувсунни Аьрасатнаву махъ ппурттуву дурксса «колумбайн» (Аьра­сатнаву къадагъа дурсса) террористътурал суккушиннарая, мунил багьана-сававрттая. Мукунма ванал бувсунни ва суккушиннаращал цукун талан аьркинссарив.

Ихтилатру бунни КIулши­вуртту дулаврил ххуллий ва интернетрал сетьраву терроризмалийн ва экстремизмалийн къарши бацIаврил национал центрданул аналитик Сергей Венцеллул, физикалул ва математикалул элмурдал кандидат Андрей Масаловичлул.
Конференциялул хIасиллу дуллалисса ихтилат бунни Дагъус­ттаннал Информациялул ва печатьрал агентствалул каялувчи Аьвдуразакь Жамалуттиновлул. Конференциялул хIасиллайн бувну итабакьин тIий бур сборник.