Вай бигьалагай кьинирдай, Учительнал кьини барча данна тIий, шяравун ниттичIан биян най буссияв. Лавайгу, ялавайгу ттущал аьрххилий тIайла бавцIунни жула школалий дуклай бивкIсса КIундиннал шяравасса Анисат МахIаммадова (цIана Маммаева).
Тай шиннардий жул школалий чIявусса лагма щархъаясса — КIунди-ЧIаратусса, Кьубатусса, Куматусса, ЧукIнатусса, Бах1икIлатусса, Шахьуватусса, Урувасса, КIамахъалияссагума оьрчIру дуклай бикIайва.
КIива интернатрай кIанттурду биял къахъанай, шартIру дусса шяраваллил инсантурачIагу бивтун бикIайссия. Тиха-шиха бувкIсса оьрчIру-душругу чIявуми ххуйсса тарбия ларсъсса бикIайва. Жул кIанттул оьрчIал миннащал цIакьсса дусшивугу шайва.
Анисатгу бикIайва ххуйну дуклакисса, итталун багьлагьисса душ. Щалагу ххуллийх жу дакIнийн дутлай бивкIру школалий дуклакисса шинну, та чIумуцIун бавхIусса тIааьнсса лахIзарду.
– БучIиссаривкьай вай ттула ххирасса учительтал дакIнийн бутлатисса ца-кIива махъ зул кказитрай чичин, – тавакъю бунни ттухь Анисатлул.
Ришлай буру ванил кутIасса дакIнийн бичавуртту.
– Жул, КIундиннал, школалий на дуклакисса шиннардий 8 класс бакъа бакъая. 1975-ку шинал, шяраву 8 классгу къуртал бувну, на бувкIссара дуклан Ккурккуллал школалийн. Ккурккуллал школа таний бия хъинну гур дусса, райондалий, республикалий цIа дурксса школа.
Цинярдагу дарсирдал олимпиадарттай, спортрал ва художествалул самодеятельностьрал бяст-ччаллаву школалул дуклаки оьрчIал райондалийгу, республикалийгу хьхьичIунсса кIанттурду бугьайва. Чаннасса тIааьнсса асардацIун дархIусса дия на Ккурккуллал школалий дуклакисса шинну.
ХIакьинугу ххуйну дакIний дур 1976-ку шинал жува Гъумучиял сахIналий «Молодая гвардия» бивхьусса чIун. Гужну хъатру ришлай, сахIналия гьан къабитлай бияв жу тамашачитурал. Цалчинсса кIанугу бувгьуну бувкIссияв.
Жущал, тиха-шиха бувкIсса оьрчIащал, учительталгу, щарнил жяматгу хъинсса бия. Жуха аякьалий бикIайва.
Школалул столовойлуву дукра дуллай бикIайва ца иминсса, дакI хъинсса инсан. Ижитлул ПатIимат учайва. КIиккувами оьрчIаяр дукра жун ххишалану дихьлан бикIайва. Шяравасса оьрчIру-душругу хьхьувай дуссухун бучIайва ци-дунугу нахIу-нацIусса ларсун. Щаргу ххуйя, халкьгу ххуйя. Ттун Ккурклив дурсса шинну тачIав хъама-къаританссар. Барчаллагьрай дакIнийн бутара Ккурккуллал жямат. ХIакьинусса кьинигу Ккурклиясса цучIав ххал хьурча, хьунаакьирча, дакI ххари шай.
Учительнал кьинилущал барча буллай, цIуллушиву чIа учин ччива хIурмат бусса жула учительтал Аьбдуллаева Шагьриман ХIажиевнан, Куматусса Мурадова Шагьун Кунмаевнан. Алжан нясив баннав КIундиннал ва Ккурккуллал школардай ттухьра дарс дирхьусса Сани Хъунбуттаевлун, цалчинсса учитель Кайнаев МахIаммадлун, ЩайхахIмад ХIажиевичлун, Галина ХIажиевнан, МахIаммад Хъунбуттаевлун, Башир Хъунбуттаевлун, Аьвдулвагьаб Аьбдуллаевичлун, Шагьумилав Сулаймановлун, Даниял Магьдиевлун, Пятали Аьбдуллаевлун, Нариман СалихIовлун, Аьвдуллагь ва Камилат Исяевхъан, Сибрижат Буттаеван.
ХIакьинусса Ккурккуллал школалунгу, учительтурангу на чIа тIий бура хьхьичIуннайшивуртту, тIайлабацIурду, – тIий бур Анисат.
Лажин хIадур дурссар
Андриана Аьбдуллаевал
