Октябрь зурул 30-нний МахIачкъалалив Апанни Къапиевлул гьайкалданучIан бавтIун бия Аьрасатнал личIи-личIисса регионная бувкIсса машгьурсса чичулт, республикалул интеллигенциялул вакилтал, чичул бивкIу бакъасса творчествалул кьадру-кьимат кIулми.

---

Вайва гьантрай МахIач­къалалив Аьрасатнал лагрулийсса кIира конкурсраву ххув хьуми барча буллалисса мероприятияртту дия. Ца конкурс СалихI Гуртуевлул цIанийсса — «Есть Родина, а значит, счастье есть» тIисса, кIилчинмур таржумачитурал — Апанни Къапиевлул цIанийсса конкурс «Резьба по камню». Вай кIирагу конкурсрал сиптачиталну бур Ккавкказуллал Чичултрал клуб ва Аьрасатнал Чичултрал союзрал Дагъусттанналмур отделение.

Апанни Къапиевлул цIанийсса конкурсрай ххув хьуми лахъа-хъун булланнин дайдихьу ванал гьайкалдануцI тIутIив дишаврийну дуруна. Апанни Къапиевлул оьрмулул ххуллун ва гьунарданун лахъсса кьимат бишлашисса ихтилатру бувна кIицI ларгсса конкурсирттал сиптачи, Ккавкказуллал Чичултрал клубрал президент ва Аьрасатнал Чичултрал союзрал Дагъусттанналмур отделениялул каялувчи Миясат Муслимовал, Дагъусттаннал Чичултрал союзрал председатель МахIаммад АхIмадовлул, Республикалул Печатьрал ва информациялул агентствалул каялувчинал заместитель Наида МахIаммадовал, М. Илиясовал цIанийсса «Дараччи» клубрал хъунмур Гульшан Хасаевал, Апанни Къапиевлущал дусшиву дуну ивкIсса Юсуп Хаппалаевлул арс Сулайман Хаппалаевлул, цаймигу бусравсса вакилтурал.

Вайннал кIицI лавгуна Апанни Къапиевлул дагъусттаннал ва оьруснал, аьрасатнал литература хьхьичIуннай дувавриву биялсса бутIа бивхьушиву ва ванал цIанийсса конкурсгу мура даву гихуннайгу нани дур­сса душиву.

Апанни Къапиевлул гьай­калдануцI тIутIив дишин бувкминнавух бия культуралул министр Зарема Буттаевагу. ТIутIив дирхьуну махъ Аьрасатнал регионная бувкIсса хъамал ванил кьамул бувна министерствалий. Буттаевал барчаллагь увкуна конкурсирттал-проектирттал даву лавайсса даражалий дуван хIарачат буллалисса Миясат Муслимовахь, кIицI лавгуна хIакьину, билаятрай тагьар оьлуккин дуллалисса гужру бусса ппурттуву, культура хъанахъишиву агьали цачIунмай буллалисса дусшиврул ламуну. Миясат Муслимовал бувсунни конкурсирттал гьануми мурадруну бушиву художественный таржумалул аьрасатнал школалул традицияртту ядаву ва гьаз даву.

Москавлиятусса поэтесса, таржумачи Алла Поспеловал увкунни: «Жунма дакIнийхтуну ххирану бухьурча жулва билаятрайсса халкьуннал мазругу, культурагу, жува цачIуссару».
Вара кьини Национал библиотекалуву хьунни конкурсирттал лауреатътал барча буллалисса шадлугъ. Гьуртту хьунни жюрилул члентал ва ххув хьуми. Апанни Къапиевлул цIанийсса конкурсрал жюрилуву бия Виталий Молчанов (Оренбург), Лариса Маремкулова (Нальчик) ва Анна Поспелова (Москва). Цалчинмур кIану бувгьунни Новосибирскалиясса шаэр ва журналист Юрий Татаренкол, башкирнал мазрая Рами Гариповлул назмурду таржума даврихлу. КIилчинмур кIану – лакку мазрая Космина Исрапиловал назмурду таржума дурсса Юрий Щербаковлул ва шамилчинмур кIану, — Екатеринбурграятусса Сергей Ивкиннул, македон мазраясса таржумарттахлу.

Хъирив барча бунни СалихI Гуртуевлул премиялул лауреатъталгу. ДакIнийн бутанну, СалихI Гуртуев – Къабардин-Бал­кьарнал ва Къарачай-Чар­гаснал халкьуннал шаэр ушиву, литературалул дунияллий машгьурну ушиву балкьарнал мазрайн дунияллул литературалул ва оьруснал классикалул произведенияртту таржума бувману. Хъамаллурал ихтилатирттаву кIицI лавгунни МахIачкъала Аьра­сатнал поэзиялул хъуншагьруну ккалли буван бучIишиву, чIявусса мазурдий чичлачисса шаэртал бушивруцIун, таржумачитурал конкурсругу бюхттулсса даражалий дувайшиву, Аьрасатнал агьалинал литература, поэзия машгьургу, гьазгу дуллалисса кIану бушиву.

Хъамаллурал-шаэртурал ва МахIачкъалаллал школарттал дуклаки оьрчIал дурккуна назмурду. «Зунттал хъами» журналданул редактор Аьжа АьбдурахIмановал бувсуна буттал (Ю.Ххаппалаевлул) ва Апанни Къапиевлул дусшиврия, бувккуна Къапиевлул буттачIан чивчусса чагъардавасса ца.

Конкурсрай ххув хьуминнан дуллуна арцуйнусса бахшишру ва дипломру. Аьрасатнал Чичултрал союзрал Дагъусттаннал отделениялул ва Ккав­кказуллал клубрал цIаниятусса Барчаллагьрал чагъар буллуна Апанни Къапиевлул конкурсрал спонсоршиву дурсса «Дараччи» клубрал президент Гульшан Хасаевахьхьунгу. ДукIумур конкурсрал спонсоршиврул хъунмур хъаргу вара «Дара­ччилулъя» ларсъсса. Гульшан Хасаевалгу барчаллагь увкунни «ДараччилуцIун» конкурсран арцуйнусса кумагру бувсса Марис Илиясовлухь, Зиябуттин ХIажимирзаевлухь ва Роберт Аьлиевлухь, хъамаллуран Дарбантлив ва Самурдал вацIлувун экскурсия бувсса «Байрам» тур-фирмалул хъунмур Тамара Закарьяевахь, хъамалушиндарал ссупралулсса бувсса «Инт» кафелул хъунмур Саидат Кьурбановахь, Миллатрал библиотекалул директорнал хъиривчу Сарат Жаб­раиловахь ва вава библиотекалул культуралул программарттал отделданул хъунмур библиотекарь Муслимат Абакаровахь.

Апанни Къапиевлул цалчинмур конкурсрал (цалчинмур конкурс дукIу хьуссия) жюрилул хIукму бувссия ттул шеърирдал лугу, оьрус мазрайн таржума бувну, итабакьин. Ва лу итабавкьусса Москавуллал «СТиХИ» издательствалул редактор ва таржумачи Алла Поспеловал бувсунни цуппа гъирарай таржумарттаха зий бивкIшиву. Нагу дакIнийхтуну барчаллагьрай бура ттулла назмурду къалакрачIангу диян дувансса ва даву дурминнайн – Миясат Муслимовайн ва Алла Поспеловайн, назмурдал подстрочник­ру бувсса Роза Эльдаровайн ва луттираву ишла дуван цалла суратру дуллусса Альберт Хаджаевлуйн.

Мяйжаннугу, агьали цачIун­май бувавриву биялсса гужгу, тIилисингу пасихIсса мукъухь бушиву исват хьунни вай гьантрай МахIачкъалалив.