Дагъусттаннай хьунни мобилизоват буллалаврия рязи бакъасса цаппара акциярду. Мукунсса акция хьунни Хасавюртуллал райондалийсса Эндирей шяравугу.
Дагъусттаннал БакIчи Сергей Меликовлул баян бунни мобилизациялийн къаршисса акциярду дазул кьатIаллил хIарачатрайсса душиву.

– Жула муттаэтал хIарачат буллай бур жула халкь кIибищун бан.
БувчIлачIисса зат бур МахIач­къалаливсса акциярдугу миннал хIадур дурсса ва миннал каялувшиннаралу нанисса душиву. Укунсса иширттащал хьунабавкьуссару жува 90-ку шиннардийгу. Мунил ахир цукунсса хьуссарив, хIайп, чIявучин хъамабивтун бур. Хъамабивтун бур жула халкьуннан Каспийскалий, Буйнакскалий инсантал яхьусса къатри пIякь учин бувсса ишру, вокзаллайсса ва метрополитеннавусса пIякь учавуртту. Вай акциярдавух цивппа провокатортал гьуртту къашайссар. Миннал я цала оьрчIру, я хъами, я ссухълу къагьанбантIиссар цала къуллугърал буржру биттур буллалисса полициялул зузалтрайн ххяххан. Дагъусттанлувтурал дянив дичлай, вайннал кьаст дуссар тагьар оьлукъин дансса, чил билаятирттал спонсортурал арцу хIалал дансса. Вай лавмартшиву дуллай бур, цала гъан-маччанай дакI цIуцIисса инсантал цала мурадру щаллу бан ишла буллай. Президентнал жула хьхьичI бивхьусса мобилизациялул масъала жува щак бакъа бартбигьинтIиссар.
Районнал хъуниминнан тагьарданул ялув личIлулну бацIан аьркинссар, дурсса сияхIру бакIра-бакIрах ххал дан аьркинссар. Жула мурад аьркинсса ккал щаллу даву бакъар. Жунма аьркинссар жула аьралуннал гуж-цIакь ххишала бансса, билаят буруччин хIадурсса арамтал. Сборный пунктирдайн на навагу иянна. Аьралитал гьарца аьркинмунил щаллу бантIиссар. Оьвчаву дуллай ура дагъусттанлувтурайн, провокациярттал хъяврин бувну, информациялул дяъвилул ласун мабацIару. Зу зула оьрмугу, бучIантIимургу зува ишла буллалиминнал амбициярттал цIаний зиялий гьан мабувару.
Жула аьралитуран – цалчин­сса гьантрая байбивхьуну, аьралий операциялуву гьуртту хъанахъиминнан ва тайннал чIарав бацIан хIадурминнан чIа тIий ура тIайлабацIу. Ххувшаврищал зана шаву,– увкунни Дагъусттаннал БакIчинал.
ПаччахIлугърал Думалул депутат Султан ХIамзаевлул баян бунни Хасавюртуллал райондалийсса тагьар къулагъасрайн ларсшиву. Ва увкIунни Эндирей шяравун.
– Инсантуращал аьркинсса куццуй гъалгъа тIун аьркинссар. Миннал суаллая нигьабуслан аьркиншиву дакъассар. Гьарзат паракьатну бувчIин бан аьркинссар, – увкунни ванал.
Султан ХIамзаевлул бусласимунийн бувну, Дагъусттаннай призыврал тагьар оьккину дакъар. Ванал мукунма бувсунни Эндирей шяравусса митингру оьваннасса фейкрая дайдирхьушиву.
–МахIачкъалалив акция учинсса акция къархьуссар. Ва кьини шагьрулул байран кIицI дуллай буну тIийри шагьрулувун чIявусса халкь бувксса. Цаппара инсантурал рирщусса суратру дирхьунни, ми митинграйн бувксса кунма ккаккан бансса кьаст лархIунни, – тIий, бувчIин буллай ур ХIамзаев.