Лакрал район цIунилгу хьхьичIун дурккунни

КIанттул цилакаялувшиндарал органнал дурсса давурттан ДР-лул ХIукуматрал гьар шинах кьимат бищайссар, миннул хIасиллайну ккаккан дувайссар муниципал сакиншиннардал давурттал мюнпатшиврул рейтинг.

2021-ку шинал дурсса давурттал хIасиллайн бувну, яла хъинми ккаккияртту хьун дур­сса муниципалитетирттан кумаг бувантIиссар республикалул бюджетравату. Ми кумагирттан итадакьинтIий дур 25 млн къурушру.

Республикалул шагьрулул округирттал ва муниципал районнал давурттал мюнпатшиврун кьимат бивщуну бур 12 цIакь дурсса ккаккиялул гьанулий­сса федерал рекомендациярттугу хIисавравун ларсун. Мониторинг дурну дур ДР-лул Экономикалул ва территориярттал лябуккулул министерствалул.

Кьимат бищавринсса шартIру архIалсса дикIаншиврул, муниципалитетру дарчIуну дур ххюва зоналийх: 10 шагьрулул округ, 12 бюхттул зунттал зоналул район, 11 зунттал зоналул район, 8 зунттал хьхьичIсса зоналул район ва 11 арнил зоналул район. Миннул давурттал мюнпатшиврун кьимат бивщуну бур укунсса давурттал хIасиллайн чул бивщуну: экономикалул лябукку, социал ара, машинарттал ххуллурдал тагьар, агьалинансса транспортрал хIаллихшинну, агьали кIанттул цилакаялувшиврул органнал давурттая рязину бушаврил даража.

«2021-ку шинал дурсса давурттал хIасиллайн бувну хьхьичIунсса кIанттурду бувгьуну бур шагьрурдавату – Дарбантуллал (1-мур кIану), Каспийскаллал (2-мур кIану), Къизилюртуллал (3-мур кIану), бюхттул зунттал зоналий – Лак­рал район (1-мур кIану), Бущихъиял район (2-мур кIану), Агъуллал район (3-мур кIану), зунттал зоналий – Лаващиял район (1-мур кIану), Ххунзахъиял район (2-мур кIану), Ахттиял район (3-мур кIану), зунттал хьхьичIмур зоналий – Сулайман-Сталлал район (1-мур кIану ), Хивуллал район (2-мур кIану), Хайдакьуллал район (3-мур кIану), арнил зоналий – Хасавюртуллал район (1-мур кIану), Нугъайнал район (2-мур – кIану), Къумтуркъалаллал район (3-мур кIану).

Ххув хьуминнан грантру дулайссар дотациялул журалий республикалул бюджетравату. ХьхьичIунсса кIанттурду бувгьуминнан грантру дулайссар миннал давурттал мюнпатшиврун бивщусса кьиматрах бурувгун.

---

Дагъусттан Республикалул БакIчи Сергей Меликовлул вай гьантрай къулбас дурунни кIанттул цилакаялувшиндарал органнал 2021-ку шиналсса социал-экономикалул ккаккияр­ттахлу грантру дуллалишиврийн багьайсса Указрай.
Ххув хьуминнавух ва базилухгу дур Лакрал район. Лахъсса зунттал районнал дянив Лакрал райондалул бувгьуну бур цалчинмур кIану.

Зулайхат Тахакьаева
ДакIнийн бутанну, хьхьи­чIунсса муниципалитетирттан грантру дуллай байбивхьусса 2008-ку шиная шийнмай Лакрал райондалул ацIния кIилчинни хьхьичIунсса кIану бугьлагьисса. Цалчин грантран лайкь хьуссар Лакрал район 2009-ку шинал, 2008-ку шиналсса ккаккиярттайн бувну, аьщуйн щуну учин, Юсуп МахIаммадов райондалул бакIчину зий цалчинсса шинал хьун дурсса ккаккиярттахлу. Муния шиннай гьарца шинал лув-ялув ласайссар грант (кIану бувагу къабувгьуну лях ларгун дур так ца 2017-ку шин). Мукьилчинни цалчинмур кIану бувгьусса.
Грантран дурксса арцу чун харж дан дакIний буру куну цIувххукун, Юсуп Ма­хIаммадовлул бувсунни хьхьичIми шиннардий грант­ран дуркIсса арцух Гъумуксса парк бакьин бувшиву, Дагъусттаннал Вирттаврал суратирттал аллеягу бувну. «Гьашинуминнул ялув ттигу пикри банну», – тIий ур райондалул бакIчи.
ДакIнийхтуну барча тIий райондалул каялувшиндарахь ва щала агьалинахь ва ххувшаву, чIа тIий буру хъуни-хъунисса тIайлабацIуртту!