Ца ххуллух, муниннин кIива-шанма гьантлул хьхьичIва хIадур хъанайгу бивкIун, Камил Чутуевгу архIалну, хъунмасса ххуллугу бивтун, лавгссияв лакрал ухссавнил дазуйсса кIира цанничIан ца гъансса ЧIаящиял ва Муккурдал шяравун биян ва суратругу рищун.
Лавгун, кIирагу шяравунгу бивну, гьарцанний цинма-цинма лайкьсса тамашагу бувну, зана хьуну бувкIссияв махъунмай – цурда ца суратгу къарирщунма. Валлагь, тIайлассар, къарирщуна Камил Чутуевлул царагу сурат. Къарирщуна, Аллагьнал ссавнияту бивтсса баргъ цан ччисса куццуй бивтун бакъар тIий.
– Да, рищаярчу, ина ци тIиссара! Бургъищал ччалаччисса инсан икIайссарив?! – тIий, вев-гьарай тIий бивкIру жу – тай шяраваллавун Камиллущал архIал ялагу та гьан хьувив къакIулсса нагу, ттул гьалмахталгу. Ай, юх! Рищун ан шайсса Камил икIайссарив. БувкIссияв лавгсса куццуй махъунмай.
Мугу мурив, ца цама ттула гьалмахчуналгу бувсуна, сурат рищунну тIий, Камиллущал кIа жула Лакку билаятрайсса ца яла бюхттулмур зунттуйн – Щунуйнгу лавхъун, мукунма, царагу суратгу къарирщунма, махъунмай бувкIру куну.
Ва лахъисса нагъил ссайн дурцуну нанисса затри учирча – Аминнул арс Камил Чутуев хъинну хъунасса, ххишала акъа усттарсса фотограф ушиву тасттикь бан ччисса хIуччалучIан бувцуну нанисса затри.
Цалла язи дургьусса сянатраву оьттулгу, ттурчIалгу профессионал акъасса инсаннаща къашайссар, лахъан усса Щуну-Зунттул кIиллувунгу лавхъун, цанна ччисса, кьамулсса куццуй дагьан къананисса суратгу къарирщунна риртун, махъунай учIан.
Фотохудожник Камил Чутуевлул иттала ва канила дурксса сурат, цайминнан къакIулли, ттун ттунна дурчIай найдунура тихара, манзилданий. Кказитрай ягу журналданий рирщусса суратрал лувсса чичрулух урувагу къаурувгна, увчIай заллу цу уссарив.
Ва фотограф авторсса гьарца суратрал вивх чара бакъа бикIай экьилавгун ляличIисса чани, чаннал зурзу. Га чаннал хъунмур биялагу чассарив найбуна исватну лаласун къахъанан бикIай – ссавнияту бивтсса бургъияссарив ягу цала фотографнал дакIнияссарив. ХIасибул калам, ми кIивагу чани цаннияр ца хIикматну хIала бувххун хIасул хьусса куннасса дикIай Камил Чутуевлул жунна кьадрулий пишкаш дайсса суратру.
Цуппа «Фотография» тIисса мукъул мархлул мяънагу грек мазрая «чани чичлай ура» тIисса душиву хIисавравун лавсукун, ляличIинура магьирну ва махIатталну му мяъна даркьунугу дур Камиллул янил ва канил хатIлицIун. Ванал цумурцагу сурат ттунна чIалан дикIай чивчусса чанину.
Яллагь, янувну чаннасса лякъиннав Аллагьнал вил кьадарданий чивчумургу, чаннану зияратсса хьуннав ина вания тиннай рищунтIими, чичинтIими суратругу.
Ниттил увну гьашину вин бартлаглагисса 85 шин – ми хъанахъиссар ина вила тамашачитурал ва дустурал дакIурдиву чирчусса тарихийсса мяйцIаллий ххюра суратну! Ттигу цимирагу дакI ххарисса сурат чичинсса цIуллушивугу, кьудратгу дулуннав вихьхьун, жул дус ва уртакь Камил!
Руслан Башаев
