Августрал 10-нний хьунни ДР-лул БакIчиначIасса Аварасса тагьарду духлаган даврил комиссиялул батIаву.

Дагъусттаннал БакIчинал бувсунни гьавалул кIиришиврийн бувну цIу лачIаврил ишру гьар­за хъанай бушиву. Мунал тIиму­нийну, махъсса 30 гьантлий сияхI­райн лавсун бур 146 гектарданий цIу лачIаврицIунсса 285 иш.

Республикалул каялувчинал бувсунни щинал ва туристътурал объектирдай хъанай бушиву инсантурал цIуллушиврийн зарал биллалисса ишру. Гьашину республикалий щинал объектирдай оьрмулуцIа хьуну ур 35 инсан, ххассал увну ур 41.

ЦIу лачIаврил иширттал хIасиллая ва щинал ва туристътурал объектирдай инсантурал мюхчаншиврия бувсунни ГО-ва ЧС-рал иширттал министр Нариман КазимахIаммадовлул. Мунал бувсмунийну, гьашину­сса 6 зурул мутталий Дагъус­ттаннай сияхIрайн лавсун бур 886 цIу ларчIсса иш 285 гектарданий. Мунал гьартану бувсунни цу-цуми шяраваллаву кьаркьсса ххяххиярттацIух ларчIун диркIссарив цIу. Бувсунни мукунма цIу лачIаврил хьхьичIалу кьукьинсса давуртту дуллай бушиврул хIакъиравугу.
БатIаврий махъру лавхъунни цайминналгу.