Вай гьантрай Аьрасатнал Президент Владимир Путиннул «За заслуги перед Отечеством» 2-ой степени» тIисса ордендалул медаль дуллунни ЦIуссалакрал райондалийсса Чараваллал шяравасса Чупаннул ва Нарсиятлул арс Ися Буттаевлун. Украиннал аьрщарай стратегиялул агьамшиву дусса кIанттай хьусса ца яла къизгъинмур талатавриву лавайсса даражалий къучагъшиву ккаккан даврихлу дуллунни ванан кIилчинсса ПаччахIлугърал награда. ПаччахIлугърал чулухасса бюхттулсса награда лайкь дур­сса Ися Буттаев лакрал миллатраву цалчин краповый берет лавсъсса аьраличугу хъана­хъиссар. Ваниннингу Ися гьуртту хьу­ссар Сириянаву най бивкIсса аьра­лий операциялуву. Та операциялуву лайкь дурссар ванал цала оьрмулувусса цалчинсса паччахIлугърал награда – Суворовлул орден.
ЦIуссалакрал райондалул бакIчи МахIаммад-ХIажи Айдиевлул барча дунни Исял бюхттулсса награда ва чIа увкунни тIайлабацIу гихунмайсса аьралий иширттаву.
Шиккува кIицI лаган, мукьва зуруй ивкIссар кIиягу уссу – Ися ва Ислам Буттаевхъул Украиннавусса аьралий операциялуву гьуртту хъанай. Отпуск къуртал хьуну махъ Ися цIунилгу цала частьравун зана хьуссар.