ЦIараща мюхчанну яхъанан

ЦIараща мюхчанну яхъанан

Эльдар Хамавов

Хамискьини, июль зурул 21-нний, «Дагестанская правда» кказитрал редакциялий хьунни Дагъусттаннал МЧС-рал Агьаммур управлениялул хъунаманал хъиривчу полковник Эльдар Хамавовлущалсса пресс-конференция.


Эльдар Хамавовлул бувсунни хIакьинусса кьини Дагъусттаннай пожардацIун дархIусса тагьар цукунсса дуссарив, миннун ци багьантту хъанахъиссарив ва цукун мюхчан хьун багьлагьиссарив.

Ванал бусласимунийн бувну, шин дайдирхьуния шийннай республикалий 1500 пожар хьуну дур, миннува 50% — инсантал ялапар хъанахъисса къатраву.
ЦIу ларчIсса иширттаву оьр­мулуцIа хьуну ур 14 инсан, миннава 2 мюрщисса оьрчI.
Ци чаран ляхълай бур къуллугърал зузалт цIу ларчIсса ишру хьун къабитан. Гьарица шинах, гьарица сезондалий Агьаммур управлениялул зузалтрал буллай бур цIарая мюхчан шаву мурадрай надзорданул ва профилактикалул операцияртту. Ми байбишайссар ЦIусса шинал байрандалул гьантрай. Байрандалул цинявппагу мероприятияртту нанисса кIанттурдай, цIарая мюхчан хьун­сса чаран ляхълай, зузалтрал дай­ссар ххалбигьавуртту, дежурствартту, инструктажру.

Хъиривсса операция байбишайссар цIу лачIунсса нигьачIаву дусса сезондалий, инсантал ялапар хъанахъисса къатри цIарая мюхчан даву мурадрай. Дурну дуссар цIу лачIунсса ва чIаравсса вацIрайн дагьансса нигьачIаву дусса объектирдал сияхI. Мукунсса 46 объект бур республикалий.
Гьарица шяраву ккаккан дурну дуссар цIарая буруччаву мурадрай дансса давурттал план. Масала, кьаркьсса уртту дуцин, нигьачIаву дусса кIанттурдайсса аьрщи гъай учин. Сакин бувну буссар ми кIанттурдал, дачардал ялтту буккансса патрульданул группарду. Вай махъсса кIира нюжмардул дянив республикалий кьаркьсса урттуцIух цIу ларчIсса 500-нния ливчусса ишру хьуну бур.

Ва чIумул дянив подразделениярттал зузалт гьантлун кьуйла-зувийла бувккун бур цIу ларчIсса леххаврий. Укунсса тагьарданун багьана хъанахъиссар цаппара инсантурал, каялувчитурал цIарая мюхчан шаву мурадрай дан ккаккан дурсса мероприятияртту къадаву­.
Май зуруй байбишай дуккаврил идарартту ххал баву мурадрайсса «Школа» операция. АрхIала «Летний отдых» тIиссагу. Ванил лагрулий ххал байссар цинявппагу оьрчIал цIуллу-сагъшиву дуручлачисса идарартту. Ва операция хъунмурчIин цивппа оьрчIру хIадур баву мурадрай бай­ссар. Гьарица сменалий дайссар оьрчIан бувчIинбавуртту дуллалисса мюхчаншиврул кьинирду. Ва давриву гьуртту шайссар Агьаммур управлениялул арулла подразделениялул зузалт (пожарный надзор, ГИМС-рал инспектортал, психологтал, медициналул зузалт, цIу лещан дувулт).

ХIасил, вайннал лахьхьин бай­ссар оьрчIан иш багьний цукун занакьулу бикIан аьркинссарив.
– Ва даврия хъунмасса мюнпат бушиву зузалтран цанма асар шай, – тIий ур Э. Хамавов.

Сентябрь зуруйсса операция цIуллу-сагъшиву дуруччаврил объектирдацIун бавхIусса бур. Ванил лагрулий ххал байссар циняв азарханарду, социал объектру. Укун, хIалли-хIаллих тIий, пачру лахъайсса сезондалийн буккайссар. Ххал байссар ахIвал-хIал кIюласса, чIявусса оьрчIру бусса кулпатру ялапар хъана­хъисса кIанттурду. ХIакьину зий дур «Извещатель в каждый дом» тIисса программа. Вай кулпатирттаву оьрчIру шанашисса къатраву чирилул фондирттал арцух дишайссар пожардануя кIул байсса извещательлу.

ЦIу лачIун дайдихьлахьи­сса чIумал вайннул, леххаву руртун, оьрчIру чантI учин байссар. ХIакьинусса кьини укунсса извещательлу дирхьуну дур 2000 къатлуву.
Эльдар Хамавовлул мукунма бувсунни республикалул циняв районнай пожарный частьру душиву. Утти хъунисса ягу архну дирхьусса шяраваллаву бишинтIишиву постру. Шикку цIакь дантIиссар цивппа рязину зунсса цIулещан дай командартту.

Аватар

Андриана Абдуллаева

Андриана Абдуллаева

Читайте также: