Фонтан тIитIаврил шадлугърал барачат

Фонтан тIитIаврил шадлугърал барачат

Дагъусттаннал БакIчи Сергей Меликовлул агьамсса масъалартту ххал бигьлагьисса чярхнийсса совещание дунни. Дайдихьулийва ванал кIицI лавгунни ларгсса нюжмардий Дарбантлив Аьрасатнаву уттинин бакъасса даражалул мультимедийный фонтан зузи даву Дагъусттаннал тарихраву ккалли бансса ишну хъанахъишиву ва барчаллагь увкунни шагьрулул бакIчи Рустамбаг ПирмахIаммадовлухь ва администрациялул командалухь мероприятие лавайсса даражалий дувансса хIарачат буваврихлу.


– Ва шадлугърайн бувкIсса федерал лагрулул хъуниминнащал республикалун агьамшиву дусса масъалартту ххал бигьин бювхъунни. Масалдаран, Аьра­сатнал Футболданул союзрал Президент Александр Дюковлущал – жучIара футболданул даву гьаз даврил масъалартту, культуралул министр Ольга Любимоващал – культуралул ирс-ххазина ябаврицIун бавхIусса масъалартту. Аьрасатнал Сбербанкрал Правлениялул Председатель Герман Грефлущал ва билаятрал вице-премьер Александр Новаклущал ххал бивгьу­ссар социал программартту бартдигьаврил ва туризм гьаз даврил проектирдацIун кабакьинсса суаллу. Вице-премьер Дмитрий Чернышенкощал тIурча, Самур неххайн багьайсса масъалартту гьаз буварду. Фонтан тIитIаврил шадлугъ сававну тамансса мюнпатрансса давуртту ххал диргьуссар, – увкунни республикалул хъунаманал.

Ванал барчаллагь увкунни Москавлив Дагъусттаннал Кьинилул байран ххуйну хIадур дурсса Дагъусттаннал Постпредствалухьгу. Региондалул ХIукуматрал хъунаманал цалчинма хъиривчу Руслан Аьлиевлул бувсунни республикалий экономика сантирай ва лябуккулий хьхьичIуннай дуваншиврул цуку-цукунсса чаранну ккаклай буссарив. Элмулул ва кIулшивуртту дулаврил министр ЯхIия Бучаевлул бувсунни школарттал капремонтрал давуртту цукунсса бущилий най дуссарив.

Сергей Меликовлул тапшур бунни гьарцагу райондалийсса тагьардания балжину бусласи­сса доклад хIадур буван.
– Республикалул хъуншагьрулия архну буручала тIий, республикалул хъуними хъяврин буллан къахьунтIиссар районнал хъуниминнаща, цалла район ххирасса ва дакI цIуцIаву ду­сса хъуними зун аьркинссар агьалинал маэшат гьаз бавриха, – увкунни Меликовлул, цува утти­гъанну ивсса Рутуллал ва Кьурагьиял районнайсса диялдакъашивурттугу кIицI дурну.

Аватар

Патимат Рамазанова

Заслуженный работник культуры РД

Читайте также: