Ларгсса нюжмардий Дагъусттаннал БакIчи Сергей Меликов
гьуртту хьунни Дарбантливсса Низами Гянджевил цIанийсса
паркраву фонтандалул комплекс тIитIлатIисса шадлугърай
Республикалул хъунаманащал фонтан итадаркьунни Аьрасатнал культуралул министр Ольга Любимовал, ПаччахIлугърал Думалул депутат Хизри Абакаровлул ва Дарбантуллал мэр Рустамбаг ПирмахIаммадовлул.
Ва шадлугърай гьуртту хьунни Москавлия бувкIсса бусравсса хъамал: Аьрасатнал вице-премьертал Александр Новак ва Дмитрий Чернышенко, Аьрасатнал Президентнал Администрациялул хъунаманал хъиривчу МахIаммадссалам МахIаммадов, Сбербанкрал Президент Герман Греф, ПАО Сбербанкрал Юго-Западный банкрал председатель Евгений Титов, сенатор Сулайман Каримов, «Газпромнефть» ПАО-рал гендиректор Александр Дюков. Фонтан тIитIлатIисса мажлисрай гьуртту хьунни аьмну 35 азара инсан. Хъамаллурахьхьун ссалам буллалисса махъ лахълай, Сергей Меликовлул кIицI лавгунни Дарбант Дагъусттаннал ва щалвагу Аьрасатнал тарихийсса ттарцIну хъанахъисса шагьру бушиву ва барчаллагь увкунни ва байран агьалинан пишкаш дурсса сенатор Сулайман Каримовлулхь ва Хизри Абакаровлухь.
Хизри Абакаровлул кIицI лавгунни цIусса фонтан магьирлугърал произведенияну хъанахъишиву ва личIи-личIисса миллатирттал 500 инсан муниха зий ивкIшиву. Ольга Любимовал бувсунни укунсса шадлугърай гьуртту хьунсса сант дагьаву хъунмасса тIайлабацIулун ккалли буллай бушиву. Дарбантуллал мэрналгу чIурчIав дунни Нарын-Къалалул чIирацIухсса фонтан шагьрулул тарихрал цIанасса заманалущал дахIаву дуллалисса кунмасса иш хъанай бушиву.
Фонтан дуллалисса давурттаву хьхьичIунминнан дуллунни наградартту. Хъирив ккаккан дурунни хъуннасса концерт. Концертрал хъирив тIурча, ссавгу, аьвзалзаманнул Дарбантуллал шагьругу чанна лахъан буллалисса фейерверкгу.
