Июньдалул 6-нний Дагъусттаннал БакIчи Сергей Меликовлул дунни, кьатIаллил ишругу хIисавравун лавсун, Дагъусттаннал экономика сивсуну лядуккаврил Оператив штабрал батIаву.
Республикалул каялувчинал властьрал органнал бакIчитуран уттигу цал дакIнийн бувтунни аьркинну бушиву цила чIумал ва мюнпатну бартбигьлан бюджет. Мунал мукунма бувсунни ляличIину къулагъас дуван аьркиншиву национал проектру бартдигьаврих ва госзакупкартту чаннайн дуккан дурну дуллалаврих.
Ххал диргьунни цамургу агьамсса тема – региондалийн инвестицияртту кIункIу даву.
Региондалул лябуккулия буслай, Дагъусттаннал БакIчинал ляличIисса къулагъас дурунни туризмалух. Туристътурал регион хIисаврай Дагъусттан машгьур хъанай бушивугу хIисавравун лавсун, республикалул каялувчинал бувсунни аьркинну бушиву МахIачкъалалив тIитIин туризмалул пишакартал хIадур буллансса колледж.
Мукунсса пишакартал уттива хIадур булланшиврул, Сергей Меликовлул тапшур бунни цалсса ми хIадур буллан Дагъусттаннал Халкьуннал хозяйствалул университетраву.
Оператив штабрал батIаврий ХIукуматрал вице-премьер Руслан Аьлиевлул бувсунни кризисрайн къаршисса чараннал хIакъираву.
ДР-лул Ишбажаранчишиврул ва инвестициярттал Агентствалул каялувчи Артем Хрюкиннул бувсунни региондалий бартбигьлагьисса бизнесрансса кумагирттал чаранная.
ДР-лул экономикалул ва территориярттал лябуккулул министрнал буржру бартбигьлагьисса Арсен Рустамовлул бувсунни регионнал мяъналийсса (даражалийсса) ва региондалий агьалинан зузи кIанттурду хIасул буллалисса сакиншиннардал (идарарттал) давурттал мониторинг дуллай бушиврул хIакъираву.
БатIаврий махъ лавхъунни мукунма ДР-лул захIматрал ва социал лябуккулул министр АьбдурахIман МахIмудовлул. Мунал тIимунийну, 2022-ку шинал июньдалул 1-ннийнин Дагъусттаннай дузал бувну бур 2,6 азара инсаннансса зузи кIанттурду.
