Дагъусттаннал БакIчи гьуртту хьунни «БивкIу бакъасса полкравух»

[dropcap]М[/dropcap]айрал 9-нний МахIачкъалалив хьунни «Аьрасатнал БивкIу бакъасса полкрал» заназаву. Ванивух гьуртту хьунни Да­гъусттаннал БакIчи Сергей Меликов, ДР-лул Халкьуннал Мажлисрал Председатель Заур Аскандаров, республикалул министерстварттал, гужирдал идарарттал, жяматийсса сакиншиннардал вакилтал.

Мероприятиялул хьхьичI хьунни журналистътуран­сса брифинг. Ваний Сергей Меликовлул журналистътурахь барчаллагь кунни Хъун дяъвилул ва Минобороналул Украиннай буллалисса спецоперациялул иширттая тIайлану чичлай ва буслай бушиврухлу.

Азарахъул инсантал гьуртту­сса акциялул кьюкьа сукку хьун хьхьичI макьан дурцунни аьралуннал оркестрданул. Муния махъ инсантурал кьюкьа дарчунни цалва ттаттахъал, буттахъал, уссурваврал ва арсваврал суратирттащал Лениннул майдандалия ХIамзатовлул проспектрайх. Яла кьюкьа кIидарчIунни, миннувасса ца ларгунни Родопский бульварданийх.

«Ва жула яла умуд бивхьумур акцияр, пандемия сававну 2 шинай заназаву хьуссия онлайн журалий, хIакьину жува най буру жула аьдат­равун багьсса журалий. ЦIана захIматри хIисав-ккал дуван циксса инсантал гьурттуну буссарив акциялувух, ухьунссар сайки 30 азара инсан», – кунни региондалул «Аьрасатнал БивкIу бакъасса полкрал» акциялул каялувчи Мухтар Амировлул.
ДР-лул жагьилтурал министр Камил Сяидовлул тIимунийну, гьурттучитурал аьдадрал ккал гьашину цалчинни дуллалисса.

«ХIакьину на ларсун най ура ттула ватанлув, Аьрасат­нал Виричу НурмахIаммад ХIа­жимахIаммадовлул сурат. ЧIявусса инсантурал кIунттиву дур жулва чIумул инсантурал – хасъсса аьра­ли операциялул гьурттучитурал суратру. Мунил бусласиссар агьалинал кабакьу буллалишиву билаятрал каялувчинацIун ва ганал нацизмалул хIакъиравусса политикалуцIун», – кунни Камил Сяидовлул.

Кьюкьлул бакIчину ия Да­гъусттаннал БакIчи Сергей Меликов – цала ттаттал, НурмахIаммад Меликовлул, суратращал.
Гужирдал идарарттал зузалт ва кадетътал най бия кьюкьлул ахирданий. Миннал хъирив най бия Ххувшаврил волонтертал, миннахь бия Ххувшаврил Ттугълил копия.