Май зурул 23-нний МахIачкъалалив Дусшиврул къатраву хьунни Дунияллул халкьуннал дянивсса динийсса жагьилтурал форумрал хIасиллу дуллалисса мероприятие. Ваний гьуртту хьунни Дагъусттаннал Миннацрал бакIчи Энрик Муслимов, муфтинал кумагчи МухIаммад МахIаммадов, иеромонах Амвросий, Аьрабусттаннал бусурманнал ккураннал генсек МухIаммад аль-Бишарий ва цаймигу динчитал, жяматийсса ишккаккулт.

– Форумрал хIасиллу жува рязийсса хьунни, гьашинумур форум урчIилчинсса форум хъанай дур, кьатIаллил билаятирттай ва цайми регионнай ва форумрах ялугьлай бикIай, гьурттушинна дуван ччими чялиш буккай. Ванилгу исватну чIалачIи буллалиссар форумрал хайр-мюнпат биялсса бушиву, – увкунни Энрик Муслимовлул.

Аьрабусттаннаясса хъамаличу МухIаммад аль-Бишарийл кIицI лавгунни жагьилтурал тарбиялия хъар хъанай бушиву бучIантIимур. «ХIакьину жува цукунсса жагьилтал тарбия буврив, мукунссар жулла гьунттийсса кьинигу, мунияту жагьилтурал тарбиялух дагьайкунсса къулагъас дуллан аьркинссару», – увкунни ванал.

«Пункт пропуска. Офицерская история» тIисса киносуратрал режиссер Вера Соколовалгу кIицI лавгунни жулва жагьилтал ппухърунначIа кьиматрай диркIсса ирс-ххазина ва мяърипатрал гьанурду хьхьичIунну тарбия буллан аьркиншиву, Аьрасатнал жагьилтал кувннал хIурмат кувннал буну къуццу тIутIисса бакъа цамур ххуллу жунма кьамулнугу бакъашиву.