Кьурбаннул арс Илдаров Илдар
Вай гьантрай, захIматсса азардануща ххассал ан къавхьуну, лавгунни дунияллия 1-мур ЦIувкIратусса ххаллилсса адамина, уздансса агьлу-авладрал арс, яхI-къириятрал заллу, Кьурбаннул арс Илдаров Илдар. Увссар ва 1949-ку шинал ЦIувкIрав. 1969-ку шинал Германиянавун увцуссар аьрали бурж лахъан, кIира шинай къуллугъгу бувну, Дагъусттаннайн зана хьуссар. Нурулисланнул душ Шурагу щарну бувцуну, ивзссар Буйнакскалийн 1973-ку шинал, тиккува Агрегат заводрайн зун увхссар слесарь-сантехникну. Зий ивкIссар ССМУ «Даггазстройрай» 5-мур разрядрал электро-сварщикнугу, Буйнакскаллал консерварду дай заводрайгу.
Илдар уссия хъинну канил бюхъу бусса, захIмат ххирасса зузала. Буйнакскалий ванал цIа хьхьичIунсса пишакартуравух диркIссар, шагьрулул ХIурматрал улттуй ваналмур суратгу диркIссар. Лайкь хьуссар диялсса грамотарттан ва барчаллагьрал чагъардан. Илдар Буйнакскаллал ва ЦIувкIуллал жяматран бусравссия, дакI-аьмал ххуйсса, хъинсса, ка тIиртIусса, архIал зузиминнащал ва лагмацириннащал хIал бавкьусса уссия.
Ванал бивкIулул кьурчIишиву кIидачIлай, жижара буллай буру арсурваврахь ва наслулухь, уссихь ва ссурваврахь, махъсса гъан-маччанахь. Илдардул гьаттай нур дизаннав, ванан къабуллумур оьрмулул бутIа наслулун ххи бувну лякъиннав, пирдавс-алжан нясив буваннав. Ванал буцириннал оьрмурду лахъи баннав.
1-мур ЦIувкIуллал жямат
КьурбанмахIаммадлул арс Кьурбанаьлиев ХIасан-ХIусайн
Уттигъанну, ца-кIива гьантлийсса къашавайгу ивкIун, жуятува личIи хьунни щалва оьрму 1-мур ЦIувкIуллал оьрчIан кIулшивурттугу дуллай, тарбиягу буллай гьан бувсса, бусравсса учитель, яхI-къириятрал заллу, ххаллилсса зунтталчу, КьурбанмахIаммадлул арс Кьурбанаьлиев ХIасан-ХIусайн.
Увссар ва 1939-ку шинал ЦIувкIрав, дяъвилия зана къавхьусса фронтовик КьурбанмахIаммадлул ва ПатIиматлул кулпатраву. Дяъвилул захIматсса шиннардий ва хъиривсса шиннардий чIявусса захIмат буллан багьсса ниттил хIарачатрайну ччаннайгу авцIуну, арулва класс буттал шяраву къуртал бувну бур, яла ЧIяв бувккуну бур дянивмур даражалул школа. Къазахъисттаннай Гурьев шагьрулий ссяткарну зузисса буттауссичIан ва ниттичIан лавгун, тиккусса педагогикалул институтравусса физикалул факультетрайн дуклан увххун ур. Итххявхсса, кIулшивурттал хъирив агьсса ва институтраву техникалул секциярдай каялувшиву дуллайгу ивкIун ур. Институт къуртал бувайхту ва Целиноградрал политехнический институтравун дарс дихьлан гьан увну ур. Амма, буттал шяраваллихсса ччаву ялтту дурккун, ЦIувкIрав зана хьуну, физикалул дарсру дихьлан ивкIун ур.
Оьрмулул 75 шин хьуннин зий ивкIссар школалул завучну. Зий ивкIссар директорнугу. ХIасан-ХIусайн ия гьарца чулухунай итххявхсса инсан. Школалийсса станокру, техника, гьарзат ванал зузи дувайссия. Ва уссия шяраву ка къаччуччин къяцIа, мастер-универсал.
ХIасан-ХIусайн лайкь хьуну ур райондалул ва республикалул чулухасса чIярусса хIурматрал лишаннан ва грамотарттан. Шяраваллил жяматран бусравсса, библиотекалул хъунмурну зий бивкIсса кулпат Басиратлущал ванал узданну чивун буккан бувссар ряхва оьрчI. ХIасан-ХIусайн ва Басират цаннал хIурмат цаннал бусса, ккаккиялунсса лас-щар буссия, мудангу чIюлунма, лазилавкьунува бикIайва. Ччяни дунияллия лавгсса Басиратлул ва хъунама арснал КьурбанмахIаммадлул бивкIурдал кьурчIишивугу духIан багьуна ХIасан-ХIусайннун.
ХIурмат лавайсса ХIасан-ХIусайн ахиратрал шаврил хъуннасса кьурчIишиву кIидачIлай, жижара буллай буру арсурваврахь, душваврахь, вайннал наслулухь, ссихь Нижабатлухь, МахIаммадахь, щалагу агьлу-авладрахь. Цал гьав нурданул дуцIиннав, алжаннул къапурду тIивтIуну лякъиннав, махънал оьрмурдай барачат бишиннав. Амин!
1-мур ЦIувкIуллал жямат
Гьидалтил арс Аьбдулхаликьов Жамалуттин
Лахъисса хIаллай къашавайгу ивкIун, оьрмулул 86 шинаву аьпалухьхьун лавгунни Карашрал шяраватусса Гьидалтил арс Аьбдулхаликьов Жамалуттин.
Жамалуттин увну ур 1936-кусса шинал Карашрал шяраву, Дагъусттаннай цалчинминнавух Лениннул ордендалун лайкь хьуну ивкIсса Гьидалтил ва Узал къушлий.
Ппу дунияллия лавгсса чIумал Жамалуттиннун диркIун дур дурагу 6 шин. Зувира шинаву щащарну лирчIсса ванал ниттил, ххишала ташулулгу къавхьуну, цила щала оьрму хас бувну бур ца акъа-акъасса арснан.
Цал Карашав 7, яла Гъумук 10 классгу хьхьичIунну къуртал бувну, муния махъ лавгун Ленинградрайн, дяхтта зий, хьхьувай дуклай, бувккуну бур Ленинградуллал Технологический институт.
Буттал шяравун зана хьусса Жамалуттин най унува ивтун ур шяраваллил советрал секретарьну, яла – председательну. Аьшттарханнай партшкола бувккуну мукьах ва увцуну ур зун Гъумукун, райкомрал инструкторну. Муния махъ ряхра шинай зий ивкIссар Лакрал райондалул «Ххяххабаргъ» кказитрал редакторну. Мичча Жамалуттин увцуссар райкомрал пропагандалул ва агитациялул отделданул хъунаману. Миччагу ивтссар Лакрал райисполкомрал председательну, биттур буллай ивкIссар му къуллугъ 5 шинал мутталий.
1990-ку шинал, райондалул хъуниминнал ва ГьунчIукьатIрал жяматрал тавакъюрайн бувну, Жамалуттин лавгссар зун «ЯтIул Ттугъ» колхозрал председательну. Зийгу ивкIссар му даврий 5 шинай, Совет Союзрал паччахIлугъ лияннин.
Чув ци даврий, ци къуллугърай зий ивкIун ухьурчагу, ванал хIалал бувссар гьарцагу чулухасса хIурмат, кьадрулий ва кьиматрай ивкIссар архIал зузиминнал ва агьалинал дянив, бартбигьлай ивкIссар райондалулгу, жяматиртталгу хьхьичIунсса мурадру.
Жамалуттин аьпалухьхьун лагаврил пашманшивугу кIидачIлай, дакIнийхтунусса жижара буллай буру кулпатрахь Аьишатлухь, душнихь Лаурахь ва махъсса цинявппагу гъан-маччаминнахь. Цал бунагьирттал аьпа баннав, имандалий лавгун хьуннав, рухI паракьатний дишиннав.
Карашрал жямат
Кьасинбаглул арс Жанмурзаев Аьвдулбасир
Уттигъанну, оьрмулул 82 шинаву, ахиратрал хьунни отставкалийсса подполковник Жанмурзаев Аьвдулбасир Кьасинбаглул арс.
Цала оьрмулул 25 шин ванал гьан дурну дур мюхчаншиврул органнаву цала язи бувгьусса пишалий ккаккиялунну зий. Зий ивкIссар личIи-личIисса оператив къуллугъирттай, каялувшиву дуллай ивкIссар шагьрурдал ва районнал управлениярттай. ЧIярусса шиннардий зий уссия ЦIуссалакрал райондалий КГБ-лул ва ФСБ-лул отделданул хъунаманугу.
Ва ия цала даву кIулсса, низам ххирасса, тIайлашиву ччисса, цаятурагу, цайминнаягу тIалавшинна хъуннасса, лавайсса даражалул пишакар, ххаллилсса инсангу, хъинсса, вихшаласса дусгу
Чув зий ухьурчагу, Аьвдулбасир цала даврил опытгу, кIулшивурттугу кIидачIлан икIайва жагьилсса зузалтращал.
Аьвдулбасир аьпалул шаврил кьурчIишиву кIидачIлай буру цинявппагу ванал гъан-маччаминнахь. Имандалий лавгун лякъиннав. Алжаннул ххари аннав. Амин!
Аьвдулбасир мудангу дакIний личIантIиссар архIал зий бивкIминнан.
ФСБ-лул управлениялул
каялувчитал
Хъуннасса кьурчIишивугу кIидачIлай, жижара буллай буру Мирзал арс МахIаммадов Магьдихь, ванал аьзизсса кулпат
Аят
чIун дакъа жуятува лагаврийн бувну. Вил кулпатрайх дурксса кьини духIансса ссавургу, тавпикьгу дулуннав хъунасса Заннал вихьхьун. Аятлул рухI хъинний дишиннав, пирдавс-алжан нясив баннав, махъминнал оьрмурдай барачат бишиннав.
Вил хIурмат бусса дустурал чулуха Адамов АьвдурахIман, Шалласуев Шалласу, Аьлиев Загьиди, Нахаев АхIмад
