Комиссиялул батIаврий

Комиссиялул батIаврий

Майрал 11-нний ДР-лул БакIчи Сергей Меликовлул каялувшиврий хьунни ляличIисса тагьарду духлаган даврил ва цIу лачIаврия мюхчан баврил ДР-лул Бак1чинач1асса Комиссиялул батIаву.

Сергей Меликовлул бусунни гъинтнил чIумал цIу лачIавриясса мюхчаншиврул аралуву нигьачIаву хъун шаврия ва тапшур бунни хIадурну бикIан мукунсса иширттаясса нигьачIавурттайн: «Билаятрал цайми регионнай хъанахъисса, хаснува Красноярскаллал улклуй, иширттал чIалачIи буллай бур ми масъалартту хъинну захIматсса бушиву».
Сергей Меликовлул бувсунни цаймигу захIматсса масъаларттал хIакъираву: ДР-лий дур чIярусса нехру, ми дурккукун, хъуннасса нигьачIаву диллай дур шяраваллайн ва лухччайн.
2022-ку шинал нехру ду­ккаврил чIумуйн муниципал сакиншиннарду хIадур шаврил хIакъираву махъ лавхъунни ДР-лул МЧС-рал управлениялул хъунаманал хъиривчу Муслим Девришбековлул. Мунал тIимунийну, нехру дуккаврийну нигьачIаву диян бюхъайссар Бабаюртуллал, Къизлардал, Хасавюртуллал ва Къизилюртуллал районнайн. Мунал бувсунни мукунма нехру дуккаврийн къаршину дуллалисса давурттаяту.

Ххал бигьлагьисса масъалалул хIакъираву ихтилат бунни мукунма ДР-лул тIабиаьтрал луртаннал ва экологиялул министр Ибрагьим Ибрагьимовлул.
Къизилюртуллал райондалий ми иширттан хасну дуллалисса давурттал хIакъираву бувсунни муниципалитетрал бакIчи Рустам Татархановлул.
ДР-лий цIу лачIаврийн къаршисса хушрайсса къаралданул хIакъираву (добровольная пожарная охрана) ихтилат бунни ДР-лул МЧС-рал управлениялул хъунаманал хъиривчу Сабир МахIмудовлул. Мунал бувсунни зунттал районнай циксса хьуссарив цIу лачIавуртту, циксса ччувччуссарив инсантурал къатри, хьуссарив зараллу. Мунал бувсунни архсса шяраваллаву дузал бувну бушиву цIу лачIаврийн къаршисса 10 пост.

ДР-лул МЧС-рал Кризисрал тагьардал управлениялул центрданул хъунама Сулайман Рамазановлул бувсунни му идаралул дуллалисса давурттая.
ХIадур бувссар ХI.Аьдиловлул

Читайте также: