ЦIанасса экономикалул тагьардануву региондалул хъузалтрал хьхьичI бивхьуну бур цIусса масъалартту. ДР-лул ХIукуматрал Председатель Аьбдулмуслим Аьбдулмуслимовлул тIимунийну, хIакьинусса кьини жулва жува дукиялул дузал баву хъанай дур национал мюхчаншиврул гьануну.
Аьбдулмуслимовлул бувсунни республикалий масъала (задача) бивхьуну бушиву шяраваллил хозяйствалул бакIлахъия гьарзану ласлансса. Гьашину пландалий ккаккан бувну бур тамансса ххишалану гьарта дуван ахънилсса дугьансса аьрщив: нувщи бугьан 1,5 азарда гектарданий, ахънилсса – 1,8 азаруннияргу ххишаласса гектардай.
– Аьрасатнал чулухуннай ишла дурсса санкциярттал ссуссукьушивурттал хIасул дуллай дур кIулсса захIматшивуртту, мунияту миннуясса зарал чан баншиврул, жунна аьркинну дур жулла давурттаву дахханаххишивуртту дуван. Мукунсса масъалартту бихьлай ур Дагъусттаннал БакIчи Сергей Меликовгу, – кунни премьернал.