Дагъусттаннал таможнялул баян буллай бур, 2022-ку шинал апрель зурул 29-нний Аьрасатнал-Азирбижаннал участокрайсса Аьрасатнал Федерациялул паччахIлугърал дазуйсса «Тагиркент-Казмаляр» тIисса машинартту итабакьайсса пунктрай кьай духхай машинарттансса ххуллу тIивтIушиву.
Уттинин цинярдагу грузовой транспорт «Яраг-Казмаляр» МАПП пунктрайхчIин занай диркIссар. Мунийн бувну, ва пунктрайн кIилийнусса гуж багьлай буссия. 2020-ку шинал июль зуруй дайдирхьуну дуссия шикку таможнялул пункт цIу буккан буллалисса давуртту.
«Тагиркент-Казмаляр» таможнялул пунктрайхчIин грузовой машинартту итабакьлай байбивхьуну махъ къулай хьунтIиссар «Яраг-Казмаляр» таможнялулмур пунктрайсса тагьаргу. Му бакъассагу, чан хьунтIиссар шиккун букIлай бивкIсса кьай духхай машинартту.
«Тагиркент-Казмаляр» таможнялул пункт зузи бувния шинмай шикку кIивагу чулинмай итабавкьуну бур 543 кьай духхай машина.
