Нава жагьжил хьун увсса ца иш
Исвагьи литературалул иширттал мархри цукун, ча ххяххайссарив кIулминнан кIулхьунссар мунил кьюлтIшивурттугу. Ми кьюлтIшивурттавасса чIяруми ттущара лаласун шайсса ххай акъара. Циван учирча, литературалул зумуну дурсса чичрурдаву хъанахъимунийн ва кIялассар, та лухIиссар учин къабучIишиву. Исвагьи литература дур хьун бюхълай бивкIмур хъанахъийни кунма ккаккан буллалисса иш.
Нагу ччянияцIава кьалан кIунттил бувгьусса инсан ура. 1983-ку шинал бувксса 3-мур «Дусшиву» альманахрай рирщуна ттул цалчинсса насрулийсса назмурду. Ми назмурдугу дуссия мукьра. Цаннин цIа дуссия «Пиш» тIисса. Ва назму, хъуннассагу дакъахьувкун, тикрал дуллай ура цал уттигу.
Пиш
Ца чIумал ура гъарал лекьан бувсса хъюнил чIира буллай. На чIирал усттаргу акъаяв, мунияту, чара бакъашиврул ура чIирагу буллай. КIиссурайн чару багьну, гагу бавхIуну ура. Кушугу, гьич, инсаннан дакI дакьинну хъанай бакъар. Му чIумал, даву дуллалинахь учайсса тIайлабацIугу къакуну, чIарах нанисса ца душнил увкуна:
– Ххуйну хъанай бур.
Нагу:
– Лажинни, янил арача, мукун матIра, – учав.
– Ттул яруния оьрчIисса бакъар янил ан, – увкуна ганил, гурга кунна, ккурккисса симандалий, кIюрххил бургъил тIиртIусса ххунххутIул чIапIив куннасса мурччай пишгу хIасул хьун бувну.
Гьа хьуна ттул, чIиви оьрчIал кунна, ччяни ххари шайсса дакIнин га пиш щалва чIира бувну къуртал хьуннин.
Цаппара гьантрал хьхьичI бувксса «ЧIавалачин» журналданул 1-мур номерданий бакIрайн багьунни, аьпа биву, Сажид Камилавлул шеъри.
Ца пиш
На акъаяв чарил усттар,
БювчIусса чIиртту байсса.
Ттущава бюхъай куццуй
Уссияв чIира буллай.
На чарил мицI гъагълай уна,
КьютIилу канийн щуна,
Щусса кIанаяту оьттул
КIунтIру ккурун бивкIуна.
Му лахIзалий ца ссурухIи
ЧIарах бувккун бавчуна,
Зузинахь гьарнал учайсса
«ТIайлабацIу» къакуна.
Яла махъунмай бурувгун,
Яру хъяхъи бувуна:
«Ххуйсса усттар хьунссар вия,
ХIарачат бува», – куна.
ХъункIултIутIул къуп хханссия
Ганил пиш тIисса мурччив.
ЧIира бувну къуртал хьуннин
Гьа хьуна га пишгу ттун.
Гьай-гьай, ттула назмулувусса иш цаманангу ххуй бизаву ттун тIааьн бивзуна. Амма мува мутталий дакIнийн багьуна литературалуву ишласса «плагиат» тIисса махъгу. Навагу иялну жагьжил хьунав.
ХI.ХIусайнов,
2022 ш. Вихьул
