Хьурттал шяраву ва тухум ччяния шинмайсса бур. Цалчин, вайннал къатри дур щар хIасул хъанай дарчусса кIанттун хIисав байсса махIлалий, мизитрал чIарав. Ва тухумрал къяртригу хIаласса дур мукунна шяраву ччяссаннун ккаллисса агьуллащал: Ханбуттахъащал, Адамхъащал ва Аьвдулвагьабхъащал.
1886-ку шинал дурсса кулпатирттал сияхIрайн бувну, Аьлимусал арс (1863-ку шинал увсса) КьурбанмахIаммадлул бивкIун бур арсру: Сагид (1882-ку шинал увсса), Аьлимуса (1884-ку шинал увсса). Вайнная махъ бувну бур ХIажи ва Аьлил.
Вай цинявнная къачичланна, бусанна Аьлимусаяту бивзминная.
Аьлимуса Лув Жунгутайлив дувссилул усттарну зий ивкIун, гиккува миналул хьуну ур. Ваная бивзун бур ххюя арс, кIива душ. Дяъви байбивхьусса чIумал, ванал шама арс – Ибрагьим, МахIаммадрасул ва АьвдулхIалин, аьрайн лавгун бур. Шагьабуттин ва КьурамахIаммад му чIумал мюрщисса бивкIун бур. МахIаммадрасул, ччаннайн кIусса щаву дирну, хъунама лейтенантнал чиндалуву зана хьуну ур. Яла махъ мугу Жунгутайлив дувссилул усттарну зий уссия. Ибрагьим тIима дяъвилия зана къавхьуссар. АьвдулхIалин зана хьуссар дяъви къуртал хьуну мукьах.
Вай ххюягу уссил, цивппа Жунгутайлив ялапар хъанай бивкIун бухьурчагу, ххюнналагу кулпатру Хьуриятусса бувссар. Вайннал арсвавралгу чIявуминнал буттал шяраватусса бур. На ва циванна кIицI буллалисса: укунсса бикIан аьркинни цала шяравалугу, миллатгу ххирасса, хьхьичIунсса арамтал.
ЧIивима уссил, КьурамахIаммадлул, ирсирайсса сянат даххана дурну, механизатор хьуссар. Шагьабуттин, буттахъал сянатрайгу зий, яла, чIумуха лавхьхьуну, цайми давурттайгу зий ивкIссар.
Ттун гьарза-гьартану бусан, чичин ччан бивкIунни КьурамахIаммадлуяту, ттуна ва ххуйну кIулну тIий. КьурамахIаммад 1957-ку шинал Сулакьрай МТС-рай зузисса чIумал, таний Хьурттал колхозрал председательну ивкIсса АьвдуллатIипов МахIаммадлун Къараяр тIисса къутандалий комбайналий зузисса жагьилсса адамина ххал хьуну, кIул хьуну, га цувагу Хьуриятусса лявкъукун, ххари хьуну ур . Ми шиннардий колхозирттал, машинартту бакъа, яла цамур техника къадиркIссар. Так 1957-ку шинал колхозирттан ДТ-14 тIисса тракторду итадакьлан бивкIссар. Лакрал райондалий Гъумучиял ва Хьурттал колхозирттал ларсъссар цалчин му трактор. Мунийн бувну, ххуйсса механизаторталгу аьркин хъанай бивкIссар, ми хъинну чанну буну тIий. КIия тракторист ивкIссар Хьуриятусса: ца Къисттилиев МахIаммад, цагу – ХIасанов Рамазан, вайгу Сулакьрай МТС-рай зий бивкIссар.
Колхозрал председательнан КьурамахIаммад Хьурив уцин ччан бивкIссар, гьарца аьркинмунил дузал аннагу куссар. Ганалгу, рязишиннагу дуллуну, амма цала хъунама уссия, МахIаммадрасуллуя, рухсат ласун аьркинссар куссар. ХIасил, Жунгутайливсса уссищал гъалгъагу бувну, КьурамахIаммад увкIссар зун буттал шяравун. Му увкIсса чIумал Хьурттал колхозран ДТ-24 дуллуну диркIссар, зун айивхьуссар муний. Муния махъ, ччарчан комбайналий, ччарчан машиналий шоферну, зий хъунмасса хIал бувссар КьурамахIаммадлул.
Яла, чIун ларгун, гава Жунгутайлив автобусрай зий икIайссия. Пенсиялийн увккун махъ тIурча, найрдахун машхул хьуну, цIанакул хъинну ххуйсса найрдучи хьуну ур. Амма буттал кIанугу ванал тачIав кьакъабивтссар. Гъинттул найрдащал увкIун, шанма-мукьва барз байссар Хьурив. Ванащал чIивима арсгу учIайссар. Шагьрулия гъинттул бувкIсса инсантурал ванаща хъинну ххуйсса, марцIсса ницIгу ласайссар.
На кIицI бувсса кулпатру ва вайнная бивзми мудангу хIурматрай буссар Жунгутайливгу, цала буттал шяравугу.
ЧIа учин ччай бур Аьлимусаяту бивзминнан цIуллушиву, жагьилминнал цала буттал-буттахъал къириятгу, намус-яхIгу ябаву ва мукунма ххаллилну ирсирай нани баву.
АьвдуллатIип АьвдуллатIипов,
ш. Хьур
