Ю. Хаппалаев

Маннархъал Мусаха

КIиямаксса оьнтIуллув,
КIамаксса халкьуннаву
ХIакьсса нарт хьунна ина,
Лахъ бувну миллат вила.

Агь, машаллагь, машаллагь,
Машаллагь, Маннар Муса!
Аспироз, Мирихрайнгу
Левххун найгу ккакканнав!
Агь, барчаллагь, барчаллагь,
Барчаллагь, Маннар Муса!
Аспироз, Мирихрайнгу
Левххун найгу ккакканнав!

Дякъил ккарччив хъя кусса
КIи дайдихьулул кьини,
Инт дучIаншиву буслай,
Космосрайн левхсса читIуй.

ЦIурттал хъюрдайнсса ссапар
ТIайлабацIусса хьуннав!
Ина лавгсса магистраль
ХъункIултIутIан ххяхханнав!

М.-З. Аминов

АцIва барзри

АцIва барзри хIакьину
Ина цIурттавух лехлай,
Аьламрал лухIи цIаннал
ЦIакьшивуртту ттирихлай.
АцIва барзри ня даслай,
ДакIнивусса оь бацIлай,
Ризинтрал чIуен даврил
ТтурчIардил ттарцIру цIарцIлай.

Валлагь, нагу, вил уссу,
Кайпрай акъара шилу,
МикIлачIлай, аслай ура
Ссутнил гъили бургъилу.
Ца вас-ццах бур дакIниву
Вил иш цукун бурвав тIий,
Аьламрал бурантругу
Ттуйх бишлай бур, ав-ав тIий.

Увххун, шавай учIайхту,
ЧIирай ххал шай вил сурат.
Вил ссирссилттайн я щайхту,
Цамур шай кьюлтIсса кьудрат.
ЦIана циняв лакрачIа
Дунуккар вил ишара,
Нагу, дукра дукайни,
Вингу кIану бишара.

Цуксса архну унугу
Ина цIурттал дус хьуну,
Вана, учара, Мусай,
Вингу кьуру бувцIуну.
КъюкIгу дур ттул хъита тIий,
Му вил къюкIличIан диян,
Лакрай дарцIу кьинилул
Савлугъ лещан къаритан!

А. ХIусайнаев

КIийн нанима лас ччива

ЦIа тIий ура Муса Маннаровлул ниттин ва кулпатран

Ссавний Гагарин ия,
Дунъяллул лагма уклай,
Щяв, шилу, циняв бия,
ТIанкIа тIий, ххарил лехлай.

Та кьини, кьунниялай,
Душ бия щар хьуну най.
КIийн нанима лас ччива,
Та жалин-душнил тIива.

Шин космосраву руртун,
Чув цIуллу-сагъну ия,
Жип чанна цIурттал дурцIун,
КIа щяв ликлан най ия.

Хьуна арснан кьура шин,
Аргъирай бия жалин,
КIия увкIма арс ччива,
Та жалиндалул тIива.

Кьамул бувунни дакIнил
Дагъусттан зунттал душнил
Гьан итан лас аьрххилий,
Нигьал ва хьуллил хьунин.

ХьунтIиссар ссавургу дан
Ниттища, учIаннин арс,
Лавсун жунма ссайгъатран
Ссавнияту баргъ ва барз.

М. Щурпаева

Агь, виричу Мусай

Космонавт Муса ур цIурттачIан лехлай –
Гъумучиял оьрчIру ххарил леххавай,
Лухччи-къурдайх лечлай,
оьрчIру бур луглай,
Космонавт ликкансса кIантту ххал буллай.

Кув бур Оьллаарив учIантIиссар тIий,
Кувгу – Дяркъу-ЩинацI
ликкантIиссар тIий.
Зунттурду бунугу лагма бюхттулсса,
ХIадур дурну дуссар кьангу ххаллилсса.

Ххуллурду бунугу Лаккуй жапасса,
Ссаврунная ххуллу буссар илкинсса,
ОьрчIру буссар Гъумук хъинну зирангсса,
Муса ливксса кIанттайн лечин хIадурсса.

ЧIявусса хаварду буссар бусансса,
Хъиннува чIявусса – Мусахь цIуххинсса,
Агь, виричу Мусай, вин кIулссания
Буттал шяравусса оьрчIал шадшиву.

Вил бюхттулсса ххуллийн, жапасса даврийн,
ХIадурну буссару кумагран лечин!

ХI. ХIажиев

Лакрал икартал

Аьвзалзаманнайва инсаннал хиял
Бияйсса бивкIссари архсса цIурттачIан,
Мякьнугу бивкIссари аькьлугу мунал
Аьламрал кьюлтIшиву ашкара дуван.

Ссавнил дагьанттувух,дакIгу дайдитлай,
Бургайсса бивкIссар гай бургъи-зурувун.
Бюхттулну лехлайсса барзуй мяш хъанай,
Хьурдай тIий бивкIссари ссурулун гьаз хьун.

Танийва, азаллий шанттуршку шинал,
Кьуватсса хъаругу хъачIунттай ларчIун,
Зунттал барзул дакIсса ца зунттал жагьил
Бюхттулсса Щунуя ссавнийн гьаз хьуссар.

Гьаз хьуссар та жагьил бюхттул ссурулун,
МуркIа хьуссар жагьил, агьну ххяллавун,
Амма цала аьпа кьабивтссар махънан,
Хъаттирдал кьуватгу – лакрал вирттавран.

ЧIивисса бунугу ттул ххира миллат,
ЧIявусса буссари гьанурду мунил,
Миллат бюхттул бансса батирнал гьунар
Вана ттигу бунни Маннархъал Мусал.

Миллатрал пахрулун лайкь хьусса къучагъ,
Левххунни цIурттачIан мусил жамилий.
Левххунни лаккучу аьламрал ардайн,
Ссурулун хъит дурсса ГъартIул хъаттирдай.

Хьурдай гьаттардива тти бизан буван
Ккурккуллал Зайдилав, Гузунхъал ХIасан,
Аьлам лахьлай бивкIсса лакрал аьлимтал,
Аьламравун левхсса цала арс ккаккан.

Хьурдай уттава бан игитсса вирттал
Аминтахъал Наби, АхIмад-Хан Султан.
Аман, Къалалия Къайдар урган ан,
Бюхттулну гьаз хьусса чIаххувчу ххал ан.

Ж. Дагирманов

Пахру ба, Лакку улчай

Вил миллат чансса бур,
цIа машгьурсса дур,
Машгьур дан бюхъайсса буну тIий вирттал.
Пагьму-гьунардугу лап бусравсса бур,
Бусравшиву кIулсса буну тIий нартътал.

ХIавинахъал Саэд, Саэдхъал Гьарун,
Инкьилабрал аьскар – миннал гьалмахтал.
Мусил цIуртти лавсъсса ххюя лаккучу –
Лайкьссар вин пахру бан,
ттул Лакрал улчай.

Зунттал барзул биза ссурула бувну,
Ссав хIайран дуванну лахъну тIанкI дурну,
Дуниял мяш хьусса гьунар бувусса
Аминтахъал Наби – гьарнансса пахру.

Ссавруннал пагьламан, АхIмад-Хан Султан,
Душмантал къир байсса къучагъсса инсан:
Гьаваллавн гьаз хьусса кIулшайхту лачин,
Уххан кIану бакъа личIайва язид.

Космосравун левххун, таварих чичин,
Хьул бивхьу умудрал мурадрайн иян,
Тавба дурну увксса Маннархъал Мусай,
Ина гьаз дунни сий лакрал миллатрал.

Къапихъал Апанни сагъну уния,
Санаъ дуванссия назмурдал чарслуй,
Чаринхъал МухIуттин изан увния,
Мажлис батIинссия лакрал вирттаврал.

Аь. Мирзаев

Маннархъал Мусахь

Аьрххилия шавай зана ивкIманахь
Авурав учайсса аьдат дур жула.
Авуравгу куну, ка дугьаннача,
Муса, ттучIанайгу чансса гъан хьула.
Дуниял ххуй дурсса интнил тIутIивгу,
Гъинтнил хъюрухъ багьсса щюлли шатIивгу,
Ссутнил хъахъи чIантIай силул пар-паргу,
Цалчин марххалттанул магьилул нургу
Къаккаклай вин, Мусай, ца шин хьуннихха,
ТIабиаьт дакъасса аьламрал кIанай
Муксса хIаллай ина бизар къавхьурав?
Хула, илтIа хьурав? Хула, уч хьурав?
Цуксса хIал хьурчагу, ттун кIулли, Мусай,
КIункIу тIий диркIшиву
вил дакI аьрщарайн:
АрсначIан, душничIан, нитти-буттачIан,
Оьрмулул дусначIан – аьзизмуничIан.
Ттун кIулли вин, Мусай, чIалай бивкIшиву
Дагъусттан зунттурду, къума дарарду,
Зунттал хъачI-мачIайсса
мюрщи щархъурду,
Лакку аьрщарайсса буттал минагу.
Ша бизансса аьрщи дакъасса кIанай
Хъунав шай ххивахха инсан космосрай,
Инания тава та ура, Мусай.
Зюннавлул ва дачIул чIу буккан барча,
Учинссия ина цIанакул «Гьарсса!»
Балайгу учинну, тIащигу данну,
Бархъара щарссанил був къюнарттува
Вай зунттал щаращал щингу хIачIанну,
Лаккуйнмай лавгукун инагу, нагу,
ЧIиви МусачIангу хъамалу гьанну:
Ина кIа космосрай хьхьу рутай хьхьуну
Увну ивкIссар кIа оьрчI лакку щарссанил,
Вил хIурматран вил цIа оьрчIангу дирзссар.
Чун иян анавав кIа оьрчI хияллал?
Чун иян арчагу, цучи хьурчагу,
Ссав кунна, илкинсса дакI кIанал хьуннав.

Аь. Исмяилов

Аврав, зунттал итаргуй

Космосраву чIун дурккун,
Ссавнил жами ливккун най,
Вих ялугьисса жугу
Циняв буру шадлугърай.
Ххуйсса дагьаннав санти
Ссаврунная учIансса,
Бигьасса хьуннав ххуллу
Оьллаарив учIансса.

Аврав, Маннархъал Мусай,
Аврав Гъумук шагьрулий,
Барзунттал бакIру кунна,
ДакIру бюхттулсса чулий.
Ина кIа аьламраву
Ца шин дунни диялсса.
ХIасул бунни хаваргу
ОьрчIал оьрчIай личIансса.

Биттур бунни багьайкун
Ватандалул бивхьу бурж,
Ккаккан бунни илданун
Вила духIиндарал гуж.
Ца гъили баргъ бивтунни
Утти зунттайх тяхъану,
Зунттал чув ина увкIун
Му гъили баргъ архIалну.

Къаляхълай бур учин махъ
Вил чувшиврун лавхьхьусса –
Барчаллагь нитти-буттан,
Мукунсса арс хъун увсса.
Хьурдай хъузалал каних,
Мусай, вил ка чIуен дан,
Хьурдай ссавнийсса баргъгу
Вийн икрамрай бацIан бан!

П. МухIуева

***
Пахру-ххаралийнмасса
Лакрал бюхттул зунттурду
Хъиннува парх увкунни,
Хъиннува бюхттул хьунни.

Вин хъунмасса барчаллагь,
Виричусса жул Мусай,
Жул гьарца ниттил дакIний
Арсну кьамул хьусса оьрчI.

Вил буттангу барчаллагь,
Вил ниттингу барчаллагь,
Муса, ина уллусса
Миллатрангу барчаллагь.

Ш. Акниев

Аврав, Мусай

Асландалул накIлий тулакгу увну,
Лачиндалул къюкIлий къутайгу ивтун,
Ххаллилсса ниттилгу, цIасса бутталгу
Лайкьну хьуна увсса Маннархъал Мусай!

Виртталсса ппухъруннал бивзсса гьанурдай
Ина бунни чIалъа, къучагъсса Мусай.
Ссавнил къуппалуву гьунарду бувну,
ЧIалачIигу бунни бан бюхъайшиву.

Гъинтнил гъарал хъирив
бивт ссурулккуртлул
Хъиннура авур дай тIабиаьтрал аргъ.
Балайрду чин булбулт багърачIан бучIай,
Жу балай тIи буллан ина хьунна багъ.

Аьршлуву ина дур цIасса давурттив
Пперха тIий лирчIунни чанна цIурттачIа.
Аврав-аврав ина, виричу Мусай!
Вихьхьун дуллай буру урчIами кару.