Апрельданул 27-нний Дагъусттаннал БакIчи Сергей Меликовлул дунни Дагъусттан Республикалий аьдлу-низам дуруччаврил Координациялул совещаниялул батIаву.
Ххал бигьлагьисса масъаларттавух бия балугъравун къабивми криминал иширттаща буруччаврил ва ми бавкку ххуллурдайн буккаврил хьхьичIалу кьукьинсса чараннал хIакъиравуссагу.
Му даву дуллай бур «Аьрасатнал Федерациялий 2025-ку шинайннин экстремизмалийн къарши буккаврил стратегия» бартдигьаврил лагрулувусса дуккаврил ва жагьилтурал политикалул аралуву. Му мурадрай республикалий, кьамулгу дурну, бартдигьлай бур паччахIлугърал цаппара программартту. Республикалул БакIчинал тIимунийну, гьаман ми арардаву дуллан аьркинни балугъравун къабивми криминал иширттаща буруччаврил давуртту.
Региондалул каялувчинал бувсунни балугъравун къабивми къатIайласса иширттайн кIункIу баврил сававрттуну хъанай душиву жагьилтал давурттахун къабагьаву, тIайлабацIу бакъасса кулпатирттаву яхъанахъаву, профилактикалул идарарттал чулуха ялув бацIаву дакъашиву ва цаймигу.
Региондалул каялувчинал тIимунийну, хIакьину тамансса луртанну хIарачат буллай дур жагьилтурайн асар биян буван. Мунийн къарши буккаву хъанахъиссар ихтиярду дуруччай органнал ва республикалул исполнител властьрал органнал масъала.
Дагъусттан Республикалул виваллил иширттал министр Аьбдурашид МахIаммадовлул бусаврийну, цIанасса ппурттуву ляличIисса къулагъас дуллай бур балугъравун къабивми экстремистшиврул ва террористшиврул иширттаща буруччаврил масъаларттах. Министрнал бувсунни жагьилтуращал дуллалисса профилактикалул давурттаятугу.
Ххал бигьлагьисса масъалалул хIакъираву ихтилатру бунни цайминналгу.
Дагъусттаннал БакIчинал бувсунни профилактикалул давурттая мюнпат къахьунтIишиву, агарда ми масъаларттаха нину-ппугу, школагу чялишну зий бакъахьурча. Сергей Меликовлул тапшур бунни социал сетирдал негативсса асардайн къарши буккансса чаранну лякъин.
БатIаврий ххал бивгьунни цаймигу масъалартту.
