Инт, инсантурал чIа тIимунихгу личIину вичIи къадирхьуну, кувни ччяни дучIай, кувнигу чIал хъанан дикIай.
Апрель зурул 4-нний ца сунув ттун бакIрайн дагьунни ппиж увкусса дараччив. Сун цуппа уттигу шанай бухьурчагу, дараччив дия ххуллийх наниминнансса бахшишну, интнил цалчинсса ссалам-ссайгъатну.
На дараччал сурат ришлай унува, ца най, бувкIун, дараччуй щябивкIуна, нарза ласлай. Да, чIалай бурив найрдангума цанма лавхьхьусса аькьлу буну, дараччив хъя кусса кIанттайн бучIансса кIулну, кIулши дуну!
Вания тихунмай жува ялугьланну къуппан-тIутIивгу (одуванчикру) ялун личиннин. Вайннулла хъирив итталун дагьлантIиссар ччиккул тIутIивгу.
Жува цуксса къатта-къушлил, дан-дитанмунил, давурттал буруккинттарай бикIайхьурчагу, явара, укунсса тIабиаьтрал бахшиширтталгуру жува тирх учин буллалисса, дакIру ва пикрирду ххуй-хъиншивурттал ясир буллалисса.
